Дар шаҳри Хуҷанд чемпионати Ҷумҳурии Тоҷикистон оид ба шиноварӣ баргузор мегардад

ДУШАНБЕ, 13.06.2019./АМИТ «Ховар»/. 15-16 июни соли  равон  дар шаҳри Хуҷанди вилояти Суғд чемпионати Ҷумҳурии Тоҷикистон оид ба шиноварӣ баргузор мегардад. Чемпионати мазкур  дар Маҷмааи варзишии «20-  солагии шаҳри Хуҷанд» баргузор шуда, дар он  иштироки беш аз 50 нафар варзишгарон  дар назар дошта шудааст.

Тавре аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба АМИТ «Ховар» хабар доданд,  иштирокчиёни чемпионат варзишгароне мебошанд, ки дар марҳилаи аввал ва дуюм  дар сатҳи шаҳрӣ ва вилоятӣ ғолибият ба даст оварда,  ба даври ниҳоии чемпионат роҳхат пайдо намудаанд.

Сардовари  ин чемпионат  аз ҷониби Кумитаи кор бо ҷавонон ва варзиш  Екатерина Измайлова интихоб гардидааст.

Хотиррасон менамоем, ки чемпионати мазкур  дар як сол як маротиба баргузор шуда,  дар натиҷаи он варзишгарони беҳтарин ба тими мунтахаби мамлакат  пешниҳод мешаванд. Ҳамчунин ғолибон ва ҷоизадорони чемпионати ҷумҳурӣ аз рӯи натиҷаи ба даст овардани имтизҳо имкони иштирок дар мусобиқаҳои байналмилалиро пайдо менамоянд.