«Кохи Наврӯз» ба феҳристи «8 муъҷизаи Созмони Ҳамкории Шанхай» ворид шуд

Июнь 24, 2019 12:59

ДУШАНБЕ, 24.06.2019. /АМИТ «Ховар»/. 21 июни соли 2019 дар пойтахти Ҷумҳурии Мардумии Чин — шаҳри Пекин ба муносибати Рузи таъсисёбии Созмони Ҳамкории Шанхай (СҲШ) лоиҳаи иқтидорҳои сайёҳии кишварҳои аъзои Созмон таҳти унвони «8 муъҷизаи СҲШ», ки дар ҳамкорӣ бо давлатҳои аъзо роҳандозӣ гардида буд, аз ҷониби котиботи СҲШ муаррифӣ карда шуд. Дар ин бора ба АМИТ «Ховар» аз Кумитаи рушди сайёҳии назди Ҳукумати Ҷумҳурии Тоҷикистон хабар доданд.

Боиси фараҳмандист, ки дар ин чорабинии сатҳи баланд «Кохи Наврӯз»-и пойтахти Тоҷикистон ба сифати муъҷизаи муосир муаррифӣ гардида, ба қатори 8 муъҷизаи Созмони Ҳамкории Шанхай пазируфта шуд. Ҳозирин аз санъати наққошӣ, кандакорӣ, чубкорӣ, гаҷкориву ойинабандӣ ва ҳунари сангтарошии мардуми тоҷик тариқи аксу нигораҳо ва роликҳои видеоӣ аз наздик шинос шуданд.

Маҷмааи «Кохи Наврӯз» бо усули меъмории миллӣ сохта шуда, дар ҷаҳон бемисл аст. Маҷмаа аз 5 ошёна иборат буда, наздики 40 ҳазор метри муррабаъ кори дастии ҳунармандони тоҷик мебошад. Ҳамчунин толорҳои хурду калон, айвончаҳои тобистона, фаввораҳои ранга ва мусиқӣ ба бино шукӯҳу шаҳомати хоса  мебахшанд. 11 толори маҷмаа бо ҳунарҳои миллии тоҷикӣ, аз қабили гаҷкорӣ, мозаика аз шишаҳои ранга, сақфҳои рангубор, кандакорӣ дар чуб, сангтарошӣ ва оиннабандӣ оро дода шудаанд.

«Кохи Наврӯз» бо ташаббус ва ибтикори бевоситаи созандаву бунёдкоронаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бунёд гардида, ифтихори халқи тоҷик аст. Дар ин кохи муҳташам чорабиниҳои муҳими байналмилаливу минтақавӣ бо ҳузури сарони кишварҳои олам баргузор карда мешаванд.

Дар нутқи ифтитоҳии худ Котиби генералии Созмони Ҳамкории Шанхай Владимир Норов, аз ҷумла, зикр  намуд, ки «8 муъҷизаи СҲШ», ки  аз нигоҳи таърихӣ тамаддуни чандинасраи бою ғанӣ ва рангини мардумони моро таҷассум менамоянд, олами зебо ва нотакрори воқеияти зебои кишварҳои мо ба шумор мераванд. Ин муъҷизаҳо имконият медиҳанд, ки мо олами бепаҳно ва бою рангини таърихи мардумамонро хубтар дарк намоем.

Котиби генералии Федератсияи умумиҷаҳонии шаҳрҳои сайёҳӣ (WTCF) Сонг Ю, ки шаҳри Душанбе соли 2018 дар минтақа яке аз аввалинҳо шуда, узви Федератсияи мазкур гардид, изҳор дошт, ки давлатҳои аъзои СҲШ бо таъриху фарҳанги қадимаи худ ва иқтидорҳои бузурги сайёҳӣ аз худ гуногунии тамаддуни башариятро таҷассум намуда, яке аз асосҳои муҳими фаъолияти ин Федератсия ба шумор меравад. Вай изҳори итминон  намуд, ки давлатҳои аъзои Созмон барои рушди соҳаи сайёҳӣ ҳамкории худро боз ҳам қавитар намуда, самтҳои нави сайёҳӣ ва сатҳи баланди хизматрасониро ба роҳ мемонанд.

Мехмонони чорабинӣ бо таваҷҷуҳи хоса «8 муъҷизаи СҲШ», аксу нигораҳо, наворҳои видеоӣ ва чопӣ, ки мавзеъҳои зебонманзар ва нотакрории табиат, урфу одат, либосҳои миллӣ, ҳунар ва таомҳои миллиро таҷассум мекунанд, шинос гардиданд.

Лоиҳаи «8 муъҷизаи СҲШ» — ин силсилаи муаррифиномаҳои иқтидорҳои сайёҳии давлатҳои аъзои СҲШ мебошад, ки аз ҷониби котиботи Созмон дар ҳамкорӣ бо давлатҳои аъзои Созмон омода гардидааст. Максади асосии он муаррифии муъҷизахои миллии ҳашт давлатҳои аъзо, маҳсули эҷоди фарҳангӣ ва сайёҳии мардумони минтақаи СҲШ ба ҷаҳониён мебошад.

Дар назар аст, ки лоиҳаи «8 муъҷизаи СҲШ» дар давлатҳои аъзои Созмон ва берун аз он низ муаррифӣ карда шавад.

Июнь 24, 2019 12:59

Хабарҳои дигари ин бахш

Барои мукофотонидани ғолибони Озмуни ҷумҳуриявии «Шоҳномахонӣ» 2 миллиону 660 ҳазор сомонӣ ҷудо карда мешавад
ТУҲФАИ АРЗАНДАИ ПРЕЗИДЕНТИ ТОҶИКИСТОН. Ба беш аз 57 ҳазор оилаи шаҳри Ваҳдат «Шоҳнома» тақдим мегардад
ИЛМ ДАР БАЛАНДИИ ЗИЁДА АЗ 5000 МЕТР. Дар калонтарин пиряхи Тоҷикистон — Ванҷях таҳқиқоти илмӣ гузаронида шуд
Дар даромадгоҳи дараи Камароб Маркази хизматрасонии сайёҳӣ ба истифода дода шуд
Академияи миллии илмҳои Тоҷикистон бо Донишгоҳи давлатии омӯзгории Шинҷони Чин ҳамкориро тақвият медиҳад
Ёдгориҳои нодири тамаддуни тоҷикон дар Осорхонаи миллии Чин ба намоиш гузошта шуданд
Аз ҷониби нашриёти «Адиб» чор китоб ба нашр расид
Туҳфаи арзишманди Пешвои миллат — китоби «Шоҳнома» ба ноҳияи Файзобод расид
Байни консерваторияҳои Тоҷикистон ва Чин Ёддошти тафоҳум ба имзо расид
Намояндагони Шурои байналмилалии ҳунармандӣ бо намунаҳои сӯзании Панҷакент шинос шуданд
Сокинони шаҳри Роғун соҳиби туҳфаи Президенти Тоҷикистон — «Шоҳнома»-и Абулқосим Фирдавсӣ гардиданд
«АНДАЛЕБ-2025». Дар Панҷакент даври шаҳрии фестивал- озмуни ҷумҳуриявии телевизионӣ доир шуд