ТОҶИКИСТОН ДАР ОИНАИ БОЗОРИ БАЙНАЛМИЛАЛИИ САЙЁҲӢ. Имкониятҳои сайёҳӣ ва ҳунарҳои мардумии Тоҷикистон дар телевизиони «Kazakh TV»-и Қазоқистон намоиш дода шуданд
ДУШАНБЕ, 28.06.2019 /АМИТ «Ховар»/. Ҳафтаи равон яке аз телевизионҳои маъруфи Ҷумҳурии Қазоқистон – «Kazakh TV» доир ба махсусиятҳову мавзеъҳои сайёҳӣ ва таваҷҷуҳи Ҳукумати Ҷумҳурии Тоҷикистон ба рушди ин соҳа бо забонҳои қазоқӣ ва русӣ филм ва барномаи телевизиониро пахш намуд. Филм бо номи «Тоҷикистон» таҳия гардида, як нашри барномаи маъруфи телевизиони «Kazakh TV» — «Regional focus» ба Тоҷикистон бахшида шуд. Дар ин бора АМИТ «Ховар» бо истинод ба Кумитаи рушди сайёҳӣ хабар медиҳад.
Дар намоишҳои мазкур, беш аз 90 дарсад кӯҳистон будан, пиряхҳои азим, обҳои фаровон, кӯлҳои зебо, табиати нодиру рангоранг, чашмаву обҳои шифобахш, унсурҳои махсуси фарҳангӣ ва амсоли инҳо аз омилҳое номбар шуданд, ки диққати сайёҳонро ҷалб мекунанд ва дар муқоиса бо кишварҳои ҳамсоя омилҳои сайёҳии фарқкунанда ба ҳисоб мераванд.
Барномаи телевизионии «Regional focus» бештар сари ҳунарҳои мардумӣ, махсусан санъати чӯбтарошӣ тамаркуз мекунад. Дар барнома чӯбтарошӣ мероси таърихии миллати тоҷик муаррифӣ шуда, маҳорати волои устоҳои тоҷик, таҷассум гардидани унсурҳои фарҳангию таърихӣ дар он ва биноҳои гаҷкоришуда тавсиф мешаванд.
«Кохи Наврӯз» яке аз олитарин намунаҳои санъати меъмории миллати тоҷик ёд мегардад, ки бо истифода аз технологияи муосир бо омезиши усулҳои навини меъморӣ ва ҳифзи унсурҳои таърихию фарҳангӣ сохта шудааст.
Ба назари таҳиягарони намоиш, «Кохи Наврӯз» дар Осиёи Марказӣ ва минтақа назир надорад ва шукуҳу шаҳомати он барои сайёҳон бисёр ҷолиб аст.
Бояд тазаккур дод, ки чанд рӯз қабл «Кохи Наврӯз» ба феҳристи «8 муъҷизаи Созмони Ҳамкории Шанхай» пазируфта шуд.
Ёдовар мешавем, ки моҳи марти соли равон, дар арафаи Наврӯзи байналмилалӣ як гурӯҳ журналистони Ҷумҳурии Қазоқистон баҳри инъикоси имконият ва ҷаззобиятҳои сайёҳии Ҷумҳурии Тоҷикистон бо даъвати Кумиати рушди сайёҳӣ ба мамлакат ташриф оварда буданд. Ба хотири муҳайё намудани шароити хуби банаворгирӣ аз ҷониби Кумитаи рушди сайёҳӣ пресс тур ташкил гардида, аз натиҷаи он як қатор силсилабарномаҳо оид ба имкониятҳои сайёҳии Тоҷикистон таҳия ва намоиш дода шуданд.
Дар Тоҷикистон Бозиҳои 20-уми Делфии ҷавонони кишварҳои аъзои ИДМ идома доранд
Фарҳанги пурғановати Тоҷикистон дар Туркманистон муаррифӣ мегардад
АЗ ВОДИИ РАШТ ТО ИСКАНДАРКӮЛ. Хатсайрҳои сайёҳии дохилӣ ба минтақаҳои сайёҳии Тоҷикистон анҷом ёфтанд
Имрӯз даври сеюми Озмуни ҷумҳуриявии «Фурӯғи субҳи доноӣ китоб аст» оғоз мегардад
«БАРНОМАИ РУШДИ САЙЁҲИИ ДОХИЛӢ». Дар Тоҷикистон беш аз 400 захираи сайёҳӣ, 1000 дара, 1000 кӯл ва мавзеъҳои дигари ҷолиб мавҷуд аст
Доир ба дастгирии истеъдодҳои ҷавон дар ИДМ конференсияи байналмилалӣ баргузор шуд
Дар Душанбе Бозиҳои 20-уми Делфии ҷавонони кишварҳои аъзои ИДМ оғоз мегардад
«ДОСТОНИ ХУДШИНОСӢ». Китоби нави Шоири халқии Тоҷикистон Давлат Сафар рӯнамоӣ гардид
Даври ниҳоии Озмуни ҷумҳуриявии «Донандаи беҳтарини асарҳои Пешвои миллат» оғоз гардид
ЗАБОН–САДОИ ХОТИРАИ МИЛЛАТ. Мулоҳизаҳои академик Фарҳод Раҳимӣ ба ифтихори Рӯзи забони давлатӣ
Президенти Тоҷикистон: «Мутахассисони соҳа бояд, ки истилоҳоти дурусту фаҳмо ва мувофиқ ба мазмуну муҳтавои соҳаҳои гуногунро барои истифода пешниҳод намоянд»
