«Ваҳдату субот — заминаи устувори рушди сайёҳӣ»,- таҳти чунин унвон дар ноҳияи Рашт конфронси минтақавӣ баргузор мегардад

ДУШАНБЕ, 03.06.2019 /АМИТ «Ховар»/. Бо ташаббуси Кумитаи рушди сайёҳии назди Ҳукумати Ҷумҳурии Тоҷикистон 8 июни соли 2019 дар ноҳияи Рашт дар партави дастуру ҳидоятҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вобаста ба таҳкими сулҳу ваҳдати миллӣ, ки омили зиёд шудани таваҷҷуҳи ҷомеаи ҷаҳонӣ ба захираҳои сайёҳии мамлакат гардидааст, Конфронси минтақавии сайёҳӣ дар мавзӯи «Ваҳдату субот — заминаи устувори рушди сайёҳӣ» баргузор мегардад.

Тавре АМИТ «Ховар» бо истинод ба Кумитаи рушди сайёҳӣ иттилоъ медиҳад, конфронси мазкур ба рӯзи «Ваҳдати миллӣ» бахшида шуда, дар доираи «Солҳои рушди деҳот, сайёҳӣ ва ҳунарҳои мардумӣ» бо мақсади татбиқи босамари Барномаи рушди сайёҳӣ дар Ҷумҳурии Тоҷикистон барои солҳои 2018-2020 роҳандозӣ гардидааст.

Дар кори чорабинӣ роҳбарияти Кумитаи рушди сайёҳӣ, мақомоти иҷроияи ҳокимияти давлатии ноҳияи Рашт, муовинони соҳавии раисони ноҳияҳои водии Рашт, мақомоти дахлдор, роҳбарони ширкатҳои сайёҳӣ, соҳибкорон ва сокинони фаъоли минтақа иштирок меварзанд.

Дар конфронс масъулини соҳа якҷо бо мақомоти маҳаллӣ ва идораҳои дахлдори минтақа роҳҳои рушди сайёҳии минтақаи Раштро баррасӣ менамоянд.

Ҳамчунин, масъулини соҳа якҷо бо роҳбарони ширкатҳои сайёҳӣ аз маконҳои тамошобоби водии Рашт дидан карда, хатсайрҳои нави сайёҳӣ таҳия менамоянд ва ба пешниҳоди дӯстдорони сайру саёҳат мегардонанд.