Ҷамшед Табарзода: барои бо оби тозаи нӯшокӣ таъмин намудани аҳолии деҳот 58 миллион доллар равона мегардад

ДУШАНБЕ, 29.07.2019 /АМИТ «Ховар»/.  Чанде пеш аз ҷониби Бонки ҷаҳонӣ лоиҳаи нав  ба имзо расид,  ки охири ҳамин сол тадбиқи лоиҳа бояд оғоз ёбад.  Ин лоиҳа 58 миллион долларро дар бар гирифта,  пурра барои таъмин намудани аҳолии деҳот бо оби тозаи нӯшокӣ  масраф карда мешавад. Ин нуктаро имрӯз зимни нишасти матбуотӣ директори Корхонаи воҳиди давлатии «Хоҷагии манзилию коммуналӣ»  Ҷамшед Табарзода иброз намуд. 

Мавсуф ҳамчунин иброз дошт, ки дар доираи «Барномаи беҳтар намудани таъмини аҳолии Ҷумҳурии Тоҷикистон бо оби тозаи нӯшокӣ барои солҳои 2008-2020» айни замон 62 фоизи аҳолӣ ба оби тозаи нӯшокӣ дастрасӣ доранд. Ин нишондиҳанда пеш аз тадбиқи ин барнома 43 фоизро ташкил медод.   Айни ҳол аз рӯи ин барнома корҳо идома ёфта истодаанд.

Зикр карда шуд, ки  айни ҳол  аз тарафи Бонки аврупоии таҷдид ва рушд 5 лоиҳа амалӣ гашта истодааст.  Инчунин мувофиқи нақша солҳои 2019-2021 дар доираи лоиҳаҳо зиёда аз 20 адад иншооти обтаъминкунӣ ба истифода супорида мешаванд.