БО ОТАШ БОЗӢ НАКУНЕД! Ғаллазоронро аз сӯхтор муҳофизат бояд кард

Июль 18, 2019 16:50

ДУШАНБЕ, 18.07.2019. /АМИТ «Ховар»/. Сарраёсати хадамоти давлатии оташнишонии  Вазорати корҳои дохилии Ҷумҳурии Тоҷикистон ҳангоми санҷиши муштараки ҳолати бехатарӣ аз сӯхтор дар ноҳияи Рӯдакӣ ҳолатҳои  риоя нашудани талаботи меъёр ва қоидаҳои бехатарӣ аз сӯхторро  ошкор намуд.

Чунончи, дар хоҷагии тиҷоратии кооперативии «Фарҳод-68»-и Ҷамоати деҳоти Чоряккорони ин ноҳия Ибодулло Расулов дар ҳудуди ғаллазор бо трактори дар ҳолати садамавӣ қарор дошта, бе оташхомӯшкунаку ҳуҷҷатҳои ронандагӣ ва дигар воситаҳои зиддисӯхтор ба коркарди ғаллаи даравидашуда машғул буд. Чунин ҳолати ҳузнангез дар деҳаи Гулисойи Ҷамоати деҳоти Лоҳур, дар майдони ғаллазори хоҷагидор Файзулло Раҷабов низ ошкор гардид. Тракторчӣ Раҳим Холов талаботи қоидаҳои бехатарӣ аз сӯхторро сарфи назар намуда, бе ҳуҷҷатҳои ронандагӣ саргарми кор буд. Дар натиҷа нисбат ба номбурдагон санади ҳуқуқвайронкунии маъмурӣ тартиб дода шуда, фаъолияти онҳо боздошта шуд.

Тавре аз Вазорати корҳои дохилии Ҷумҳурии Тоҷикистон ба АМИТ «Ховар» хабар доданд, ҳолати дигари риоя нашудани меъёр ва талаботи бехатарӣ аз сӯхтор дар деҳаи Иттифоқи Ҷамоати деҳоти Султонободи ноҳияи мазкур  аз тарафи ронандаи трактори тамғаи Т-28 Саид Раҳимов  ба мушоҳида расид. Номбурда аз меъёр зиёд ба бордони трактор коҳ бор кардааст, ки ҳангоми ҳаракат як миқдори он ба роҳи мошингард чаппа шуда, ба ин васила  ҳаракати дигар воситаҳои  нақлиётро маҳдуд сохтааст.

Тибқи иттилои манбаъ, ронандаи  нақлиёти боркаш  «ГАЗ-53» аломати қайди давлатиаш 64-79 ВВ 07 РТ, Ҳабибулло Довудов низ айнан ба чунин қоидавайронкуниҳо роҳ додааст, ки   нисбат ба  ӯ чораҳои маъмурӣ андешида шуд.

Дар замини хоҷагидор Бекмурод Хуҷаков, воқеъ дар деҳаи Баракати ҷамоати мазкур аз трактори дар ҳолати садамавӣ қарор дошта ва ба талаботи бехатарӣ аз сӯхтор ҷавобгӯ набуда, инчунин бе ҳуҷҷатҳои ронандагӣ истифода бурда мешуд, ки чунин ҳолат метавонист боиси ба амал омадани сӯхтор гардад. Дар натиҷа нисбат ба  номбурда тадбирҳои қонунӣ андешида шуда, фаъолияти трактор қатъ гардонида шуд.

Бояд илова намуд, ки алҳол баҳри пешгирӣ намудани ҳодисаҳои сӯхтор дар заминҳои ғаллазор ва хӯроки дурушти чорво, тибқи нақшаи чорабиниҳои Сарраёсати хадамоти давлатии оташнишонии ВКД Ҷумҳурии Тоҷикистон, дар шаҳру ноҳияҳои мухталифи ҷумҳурӣ санҷишҳои муштарак  мегузаранд.

Бояд  ёдовар шуд, ки ҳанӯз то оғози мавсим  аз тарафи мутахассисони Хадамоти оташнишонӣ дар тамоми шаҳру ноҳияҳои ҷумҳурӣ бо роҳбарону хоҷагидорон  машваратҳои омӯзишӣ  оид ба таъмини вазъи бехатарӣ аз сӯхтор доир гардида буд.

Ҳамчунин дар ин робита,  ба масъулину мутассадиёни соҳаи кишоварзӣ амрномаю тавсияҳои зидди сӯхтор супорида шуда буданд. Вале, новобаста аз ин тадбирҳои андешидашуда, ҳамоно ҳодисаҳои сӯхтор дар баъзе аз майдонҳои ғаллазор ба амал меоянд, ки ин аз бемасъулиятии бархе аз  масъулини соҳаи кишоварзӣ дар ин самт шаҳодат медиҳад.

Июль 18, 2019 16:50

Хабарҳои дигари ин бахш

Истгоҳи обуҳавосанҷии Горбунов дар пиряхи «Тоҷикистон» навсозӣ карда мешавад
ҚАТЪНОМАИ ТАЪРИХӢ БАРОИ ОСИЁИ МАРКАЗӢ. Чӣ гуна ташаббуси Президенти Тоҷикистон зеҳни сунъиро ба рӯзномаи Маҷмаи Умумии СММ ворид кард
Ба бунёди боғҳои интенсивӣ ва суперинтенсивӣ таваҷҷуҳро бештар намоем. Шарҳи коршинос
Ҳаҷми маблағгузории Фонди иқлими сабз барои Тоҷикистон ба 235 миллион доллар расидааст
Ҷаласаи навбатии Гурӯҳи кории байниидоравӣ оид ба мониторинг ва арзёбии ҳуҷҷатҳои банақшагирии стратегӣ доир шуд
«БАРНОМАИ ДАВЛАТИИ РУШДИ МАЪРИФАТ ВА ФАРҲАНГИ ЭКОЛОГӢ». Он ба баланд бардоштани фарҳанги экологии аҳолӣ равона шудааст
Тоҷикистон дар COP31 таъсиси платформаи минтақавии инноватсияҳои «сабз»-ро дар Осиёи Марказӣ пешниҳод намуд
Директори Агентии авиатсияи гражданӣ Ҳабибулло Назарзода дар Ассамблеяи 43-юми ИКАО дар шаҳри Монреали Канада иштирок намуд
Ҳамкории Тоҷикистон бо Фонди ОПЕК дар самти ҳифзи муҳити зист густариш меёбад
Дар Кӯлоб таҳти роҳбарии муовини Сарвазири Тоҷикистон Усмоналӣ Усмонзода ҷаласаи гурӯҳи корӣ доир шуд
Тоҷикистон ва ИМА таъсиси Шурои муштараки кориро баррасӣ намуданд
Дар Павилиони миллии Тоҷикистон дар COP31 чорабинии минтақавӣ баргузор гардид