Дар Душанбе ҷаласаи гурӯҳи кории Комиссияи муштараки байниҳукуматии Тоҷикистону Афғонистон баргузор гардид

ДУШАНБЕ, 05.07.2019 /АМИТ «Ховар»/. Дирӯз дар шаҳри Душанбе ҷаласаи гурӯҳи кории Комиссияи муштараки байниҳукуматии иқтисодӣ, тиҷоратӣ, иҷтимоӣ ва техникӣ байни Ҷумҳурии Тоҷикистон ва Ҷумҳурии Исломии Афғонистон баргузор гардид.

Тавре мухбири АМИТ «Ховар» иттилоъ медиҳад, ҷонибҳо масъалаи ҳамкории судманди ду мамлакатро дар самти  стандартизатсия, энергетика, захираҳои обӣ, нафту газ, пешгирии ҳолатҳои фавқулода, ҳифзи муҳити зист, саноат, нақлиёт, фарҳанг, маориф, тандурустӣ ва ҳифзи иҷтимоиро баррасӣ намуданд.

Дар назар аст, ки имрӯз аъзои Комиссияи муштараки байниҳукуматии Тоҷикистону Афғонистон дар доираи баргузории ҷаласаи 7-ум аз рӯи масъалаҳои баррасигардида протокол ба имзо расонанд.

Ба иттилои Агентии омори назди Президенти Ҷумҳурии Тоҷикистон, Афғонистон яке аз шарикони асосии Тоҷикистон дар самти содироти мол ба ҳисоб меравад. Гардиши мол миёни мамлакатҳо дар семоҳаи аввали соли равон 35,5 миллион доллари амрикоиро ташкил додааст, ки аз ин ҳисоб содироти мол аз Тоҷикистон ба Афғонистон 35,47 миллион долларро ташкил медиҳад. Аз ин ҳисоб зиёдшавии содирот ба назар мерасад, ки он ҳамагӣ 32 ҳазор долларро ташкил медиҳад.