АЗ ДУШАНБЕ ТО НАЙРОБИ. Тоҷикистону Кения муносибатҳои дипломатӣ барқарор намуданд

ДУШАНБЕ, 09.08.2019 /АМИТ «Ховар»/. 6 август дар шаҳри Ню-Йорки ИМА маросими имзои Баёнияи муштарак дар бораи барқарор намудани муносибатҳои дипломатӣ байни Ҷумҳурии Тоҷикистон ва Ҷумҳурии Кения баргузор гардид. Дар ин бора АМИТ «Ховар» бо истинод ба Вазорати корҳои хориҷии Тоҷикистон хабар медиҳад.

Баёнияи муштаракро аз ҷониби Тоҷикистон Намояндаи доимии Ҷумҳурии Тоҷикистон дар СММ Маҳмадамин Маҳмадаминов ва аз ҷониби Кения Намояндаи доимии он дар СММ Лазарус Омбаи Амайо  имзо карданд.

Хотиррасон менамоем, ки Ҷумҳурии Кения яке аз давлатҳои бомаром рушдёбанда ва дорои калонтарин дар Африкаи Шарқӣ маҷмӯи маҳсулоти дохилӣ буда, бо бандарҳои баҳрӣ, қаҳва ва дигар зироатҳои кишоварзӣ, ҷангалзарҳои бепаҳно, ҳайвоноти нодир ва манзараҳои кӯҳистони худ машҳур аст. Номи давлат – Кения аз забони масайӣ ба тоҷикӣ «Кӯҳи сафед» тарҷума мешавад.

Ҷумҳурии Кения 12 декабри соли 1963 истиқлолияти давлатӣ ба даст овардааст ва пойтахташ шаҳри Найроби мебошад.