Бинои нави Кумитаи идораи замини ноҳияи Деваштич мавриди баҳрабардорӣ қарор дода шуд

Август 21, 2019 18:42

ДУШАНБЕ, 21.08.2019. /АМИТ «Ховар»/. Дар доираи сафари кории Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон ба ноҳияи Деваштичи вилояти Суғд ҳамчунин имрӯз бо иштироки ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Абдуҷаббор Раҳмонзода, роҳбарияти Кумитаи давлатии идораи замин ва геодезӣ ва масъули мақомоти иҷроияи ҳокимияти давлатӣ бинои нави Кумитаи идораи замини ноҳия мавриди баҳрабардорӣ қарор дода шуд.

Дар ин бинои тозабунёд барои кормандон беҳтарин шароити корӣ фароҳам оварда шудааст.

Тавре иттилоъ дода шуд, иншооти мазкур аз ду ошёна ва таҳхона иборат буда, дорои 19 утоқи корӣ, маҷлисгоҳ ва дигар нуқтаҳои хизматрасонӣ мебошад.

Қаблан кормандони Кумитаи идораи замин ва Корхонаи давлатии фаръии «Бақайдгирии молу мулки ғайриманқул»-и ноҳияи Деваштич бинои асосии худро надоштанд ва иҷоранишин буданд. Барои таъмини кормандон бо ҷойи кору шароити мувофиқ бинои бекорхобида дар маркази ноҳия баъди ҳуҷҷатгузории пурра ба тавозуни Идораи кумитаи замини ноҳия гузаронида шуд ва баъди пурра навсозӣ шудан барои кормандон шароити мусоид фароҳам гардид.

Навсозии бинои мазкур дар доираи омодагихо ба ҷашни 30-солагии Истиқлолияти давлатии Ҷумҳурии Тоҷикистон сурат гирифтааст.

Барои навсозии ин иншоот беш аз якуним миллион сомонӣ сарф шудааст.

Корҳои таҷдиду навсозии ин биноро қариб 60 нафар кормандону мутахассисони Ҷамъияти дорои масъулияти маҳдуди «Кордон-2010» дар муҳлати 11 моҳ бо сифати баланд ба анҷом расониданд.

Ҳоло бо фароҳам гардидани шароити арзандаи корӣ кормандони Кумитаи идораи замин ва Корхонаи давлатии фаръии «Бақайдгирии молу мулки ғайриманқул»-и ноҳияи Деваштич кўшиш менамоянд, ки сатҳи хизматрасониро ба аҳолӣ боз ҳам беҳтар кунанд.

Ҷиҳати дар арафаи истиқбол аз 28-умин солгарди Истиқлолияти давалатии Ҷумҳурии Тоҷикистон ба истифода додани ин иншоот кормандони Кумитаи идораи замин ва Корхонаи давлатии фаръии «Бақайдгирии молу мулки ғайриманқул»-и ноҳияи Деваштич дар рӯзҳои истироҳатӣ ба ҳашари дастаҷамъона баромада, дар раванди навсозии иншооти мазкур саҳми арзишманди худро гузоштанд.

Ҳамаи утоқҳои кормандон бо мизу курсӣ ва компютерҳо муҷаҳҳаз гардонида шудааст.

Айни замон дар Кумитаи идораи замин ва Корхонаи давлатии фаръии «Бақайдгирии молу мулки ғайриманқул»-и ноҳияи Деваштич 50 нафар мутахассисон фаъолият менамоянд ва ифтитоҳи ин иншооти замонавӣ туҳфаи арзишмандест дар рӯзҳои истиқбол аз 30-солагии Истиқлолияти давлатии Ҷумҳурии Тоҷикистон.

Ҳамчунин дар доираи сафари кории Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ноҳияи Деваштич аз ҷониби Ҷамъияти дорои масъулияти маҳдуди «Айман» як маҷмааи нави хизматарсонӣ ба истифода дода шуд, ки дар расми ифтитоҳи ин иншоот низ ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Абдуҷаббор Раҳмонзода ва дигар масъулини мақомоти соҳа иштирок намуданд.

Иншооти мазкур дар доираи Солҳои рушди деҳот, сайёҳӣ ва ҳунарҳои мардумӣ, истиқболи сазовори ҷашни миллӣ- Истиқлолияти давлатӣ бунёд карда шуда, он аз ду ошёна иборат мебошад.

Дар ошёнаи якуми ин маркази хизматрасонӣ нуқтаҳои савдо, ошхона, дар ошёнаи дуюм ҳаммом бо муосиртарин шароит, толори фитнес муҷаҳҳаз бо лавозимоти машқу тамрин ва дигар нуқтаҳои хизматрасонӣ ба роҳ монда шудааст.

Ҳудуди ин маҷмааи нави хизматрасонӣ бо шиору овезаҳои таблиғотӣ оро дода шуда, гулу буттаҳои ороишӣ шинонида шуда, чароғон гардидааст, ки шабонгоҳ хеле назаррабо ба назар мерасад.

Ин маркази хизматрасонӣ дар доираи нақшаи чорабиниҳо бахшида ба Солҳои рушди деҳот, сайёҳӣ ва ҳунарҳои мардумӣ аз ҷониби соҳибкорони ватанӣ бо пуштибонӣ аз сиёсати созандаи Пешвои миллат бунёд карда шуда, сокинон ва меҳмонон аз он ба таврси васеъ истифода мебаранд.

Август 21, 2019 18:42

Хабарҳои дигари ин бахш

Дар Намоишгоҳи байналмилалии «ИНОПРОМ» дар Тошканд Тоҷикистонро 28 корхонаи саноатӣ намояндагӣ менамоянд
Раиси вилояти Хатлон аз коргоҳҳои саноатии ноҳияи Восеъ боздид намуд
Дар шаҳри Кӯлоб ярмарка-фурӯши маҳсулоти мавриди ниёзи аввал оғоз гардид
Имсол дар ноҳияи Мастчоҳ дар 12 500 гектар чигит кишт мешавад
Ҳайати Тоҷикистон барои иштирок дар ҷаласаи баҳории Хазинаи Байналмилалии Асъор дар ИМА қарор дорад
Дар Тоҷикистон низоми миллии ҷустуҷӯии монанд ба Яндекси русӣ ва Google-и амрикоиро таҳия намудаанд
Тоҷикистон аз вусъати ҳамкорӣ бо Ҷопон дар таҷдид ва таъмири роҳҳои мошингард қаноатманд аст
«Барномаи рушди нақлиёти барқӣ дар Тоҷикистон барои солҳои 2022-2026» қабул мегардад
«СУҒД-2022». Дар шаҳри Хуҷанд Ярмаркаи VIII байналмилалии савдо доир мегардад
Миёни Тоҷикистон ва Чин ҳамкории тиҷоратию иқтисодӣ густариш меёбад
ЧОРМАҒЗ, БОДОМ, ПИСТА. Профессор Ҷаҳон Азонов ин се маҳсулотро арзишмандтарин, болаззаттарин ва муфидтарин номид
ФОРУМИ БОАО. Осиё ба сӯи дигаргунсозии «сабз» ҳаракат мекунад