Дар Душанбе воситаҳои тадқиқи бозори байналмилалӣ барои рушди тиҷорат баррасӣ гардиданд

Август 29, 2019 10:58

ДУШАНБЕ, 29.08.2019/АМИТ «Ховар»/. Мушовирон ва муҳаққиқони тоҷик дар як давраи омӯзишӣ, ки зарфи се рӯз — 27-29 август дар шаҳри Душанбе баргузор гардид, роҳҳо ва воситаҳои тадқиқи бозори байналмилалиро омӯхтанд.

Давраи омӯзишии мазкур, ки махсус барои ниҳодҳои пуштибони тиҷорати Тоҷикистон, аз ҷумла ширкатҳои консалтингӣ, иттиҳодияҳои тиҷоратӣ, доираҳои илмӣ ва ниҳодҳои марбутаи давлатӣ тарҳрезӣ шуд, аз ҷониби Маркази тиҷорати байналмилалӣ (МТБ) бо маблағгузории Ҳукумати Швейтсария дар доираи  Барномаи ҷаҳонии нассоҷӣ ва дӯзандагии МТБ доир гардид.

Дар давраи омӯзишӣ ҳадафҳои таълими методологияҳои асосии дастрас барои баргузории тадқиқот ва истифода аз онҳо,  истифодаи касбии василаҳо ва роҳҳои пажӯҳиши бозор ҷиҳати таҳлили бозорҳои байналмилалӣ, тақвияти тавоноии иштирокчиёни давраи омӯзишӣ дар самти таҳияи гузоришҳо доир ба бозорҳои мувофиқ барои корхонаҳои манфиатдор; дарки беҳтари фазои ҳозираи тиҷорат барои пешниҳоди ёрии иттилоотӣ ба содироткунандагон ҷиҳати тасмимгириҳои тиҷоратӣ; ва ҳамчунин муайян кардани бозорҳои эҳтимолӣ барои содирот ва дарёфти роҳҳои вуруди устувор ба ин бозорҳо пайгирӣ гардид. Давраи омӯзишӣ бо дархости ниҳодҳои пуштибони тиҷорати Тоҷикистон баргузор гардид, зеро онҳо ба тақвияти тавоноӣ барои баргузории тадқиқоти бозорҳо бо истифода аз василаҳои муосиру муассир ва таҳияи гузоришҳои таҳлилӣ ниёз доранд.

Барои таълим дар давраи омӯзишӣ  тренери байналмилалии соҳибтаҷриба Мигел Камачо, ки 17 сол боз дар соҳаи таҳия ва баргузории давраҳои омӯзишӣ барои созмонҳои байналмилалӣ ва ниҳодҳои пуштибони тиҷорат дар 25 кишвар фаъолият кардааст, даъват гардид.

Иштирокдорони давраи омӯзишӣ бо бастаи василаҳои муосири  тадқиқи бозори ҷаҳонӣ ва таҳияи гузоришҳо аз рӯи ин тадқиқот шинос шуданд.

Маркази тиҷорати байналмилалӣ бо мусоидати Ҳукумати Швейтсария ҳадаф дорад, ки сатҳи рақобатпазирии соҳаи нассоҷиву дӯзандагии Тоҷикистонро боло бардорад. Барои иҷрои ин ҳадаф ба корхонаҳои хурду миёна ва ниҳодҳои марбути пуштибони тиҷорат ёрии соҳавӣ расонида мешавад.

Август 29, 2019 10:58

Хабарҳои дигари ин бахш

Дар Суғд барои дарёфти грантҳои раиси вилоят озмун баргузор мешавад
Дар Эстония Хонаи савдои Тоҷикистон таъсис дода мешавад
Намояндагони Тоҷикистон дар «Аirspace world 2024» дар Женева иштирок намуданд
Роҳбари хоҷагии деҳқонии «Бобои Носир»: «Истифодаи оқилонаи 7,5 гектар замин ва даромад аз он дар баланд гардидани сатҳи зиндагии 5 оила мусоидат намуд»
Деҳқонони ноҳияи Мастчоҳ имсол дар майдони зиёда аз 23 ҳазор гектар кишту парвариши зироати кишоварзиро ба нақша гирифтаанд
Дар шаҳри Хуҷанд Намоишгоҳи X байналмилалии савдо «Суғд-2024» доир мегардад
«РОҲ БА СӮИ ТИЁНШОН». Душанбе охири моҳи май мизбони конфронси байналмилалӣ мегардад
Соли 2023 ба буҷети шаҳри Гулистон аз ҳисоби хизматрасонии сайёҳӣ ва табобатӣ зиёда аз 40 миллион сомонӣ ворид шуд
Ҳоҷагидорони Кооперативи истеҳсолии «Сомон-Бохтар»-и ноҳияи Кӯшониён майдони парвариши лимӯро васеъ менамоянд
Сардхонаи муосири деҳоти «Файзи Истиқлол»-и ноҳияи Кӯшониён ба аҳолӣ хизмат мерасонад
«ТОҶИКИСТОН-2024». Дар Душанбе Намоишгоҳи байналмилалии универсалӣ доир мешавад
120 гектар замини канори деҳаи Ғӯсари шаҳри Панҷакент бо оби полезӣ таъмин мегардад