Дар шаҳри Хоруғ Форуми байналмилалии сармоягузории «Помиринвест-2019» идома дорад

Август 7, 2019 15:12

ХОРУҒ, 07.08.2019 /АМИТ «Ховар»/. 6 августи соли 2019 дар шаҳри Хоруғи Вилояти Мухтори Кӯҳистони Бадахшон аз ҷониби Кумитаи давлатии сармоягузорӣ ва идораи амволи давлатӣ ва мақомоти иҷроияи ҳокимияти давлатии вилоят Форуми байналмилалии сармоягузории «Помиринвест — 2019» ба кор оғоз кард.

Дар Форуми мазкур беш аз 150 нафар сармоягузорону соҳибкорон, аз ҷумла роҳбарону масъулони мақомоти давлатӣ, сармоягузорон аз Иёлоти Муттаҳидаи Амрико, Канада, Ҷумҳурии Исломии Покистон, Ҷумҳурии Исломии Афғонистон, Ҷумҳурии Ҳиндустон ва Ҷумҳурии Мардумии Чин, як гурӯҳи соҳибкорон аз шаҳри Душанбе, Вилояти Мухтори Кӯҳистони Бадахшон ва вилоятҳои Суғду Хатлон иштирок доранд.

Муовини Раиси Маҷлиси миллии Маҷлиси Олии Ҷумҳурии Тоҷикистон, Раиси Вилояти Мухтори Кӯҳистони Бадахшон Ёдгор Файзов, муовини Раиси Кумитаи давлатии сармоягузорӣ ва идораи амволи давлатӣ Аҳмадзода Орзу, муовини Вазири молия Карим Гулмуродзода, муовини Раиси Кумитаи рушди сайёҳӣ Ширин Амонзода, роҳбари намояндагии Ташкилоти Оғохон оид ба рушд дар Ҷумҳурии Тоҷикистон Қозидавлат Қоимдодов ва директори генералии ширкати «Помирэнерҷӣ» Далер Ҷумаев ба таври мухтасар дар бораи мақсади форуми мазкур, имконияту захираҳои иқтисодии вилоят ба аҳли нишаст маълумот ироа намуданд.

Баъд аз он  муовини директори генералии «Тоҷинвест» –и назди Кумитаи давлатии сармоягузорӣ ва идораи амволи давлатӣ Ҷавоҳирлаъл Музаффарӣ гурӯҳҳои сармоягузорӣ ва соҳибкории В2Вро муаррифӣ кард.
Раиси Вилояти Мухтори Кӯҳистони Бадахшон диққати сармоягузорону соҳибкоронро  ба имкониятҳои сармоягузорӣ дар вилоят ҷалб намуда, оид ба самтҳо ва имкониятҳои мавҷудаи ҳамкорӣ ва ҳалли мушкилоти вобаста ба пешбурди фаъолияти сармоягузорию соҳибкорӣ дар вилоят ибрози ақида намуд.

Муовини Раиси Кумитаи давлатии сармоягузорӣ ва идораи амволи давлатӣ Орзу Аҳмадзода доир ба тадбирҳои андешидаи Ҳукумати Ҷумҳурии Тоҷикистон дар самти беҳтар гардонидани фазои сармоягузорию соҳибкорӣ, инчунин самтҳои дурнамои ҳамкорӣ изҳори ақида намуд.

Ҳамзамон дар доираи Форуми мазкур молу маҳсулоти хом ва тавлидотии соҳибкорони маҳаллӣ ба намоиш гузошта шуд. Иштирокчиёни форум дар лаҳзаи танаффус дар бораи  имкониятҳои сармоягузории Вилояти Мухтори Кӯҳистони Бадахшон, манзараву мавзеъҳои ҷолиби ин минтақа филми кӯтоҳ тамошо карданд.

Баъдан иштирокчиёни форум ба  се гурӯҳи алоҳида ҷудо шуда, дар атрофи  мавзӯъҳои «Роҳҳо ва усулҳои такмили сиёсати давлатӣ дар самти сармоягузориву соҳибкорӣ дар ВМКБ», «Минтақаҳои озоди иқтисодӣ- ҳамчун омили суръатбахши саноатикунонии Ҷумҳурии Тоҷикистон» ва «Имкониятҳои рушди соҳибкорӣ дар бахши сайёҳӣ ва ҷалби сармоя ба инфрасохтори сайёҳӣ» баҳсу мунозира карданд.
Дар доираи мулоқоти В2В соҳибкорону сармоягузорони ватанию хориҷӣ  имкониятҳои ба роҳ мондани ҳамкорӣ дар соҳаҳои мухталифи иқтисодиро матраҳ намуда, барои ҳарчӣ зудтар амалӣ намудани нақшаҳояшон назару андешаҳои худро ба миён гузоштанд.

Форум имрӯз низ идома ёфта, баъди муҳокимаи ҳамаҷонибаи масъалаҳо дар поёни кори он соҳибкорону сармоягузорон санадҳои ҳамкорӣ ба имзо мерасонанд.

Мавриди зикр аст, ки дар доираи баргузории Форуми байналмилалии сармоягузории «Помиринвест–2019» ҳамчунин баргузории як зумра чорабиниҳои дигар, аз ҷумла шиносоӣ бо имкониятҳои сайёҳии вилоят ва боздид аз корхонаҳои хурду бузурги истеҳсолӣ ба назар гирифта шудааст.

 

Август 7, 2019 15:12

Хабарҳои дигари ин бахш

Дар Ню-Йорк тавсеаи ҳамкории Тоҷикистон бо Испания, Индонезия, Тайланд ва Малдив дар соҳаи сайёҳӣ баррасӣ шуд
Муовини Сарвазири Тоҷикистон Сулаймон Зиёзода бо соҳаи кишоварзии шаҳри Кӯлоб шинос гардид
КИРМАКПАРВАРӢ ВА КОРКАРДИ ПИЛЛА-ҲУНАРИ ҚАДИМИИ МАРДУМИ ТОҶИК. Ва ё замоне Тоҷикистон 80 дарсади пиллаи Иттиҳоди Шӯравиро истеҳсол мекард
Дар Истанбул иштироки ҳайати Тоҷикистон дар Саммити XXV иқтисодии кишварҳои Авруосиё баррасӣ гардид
ПАНҶСОЛАИ РУШДИ САНОАТ. Дар Истаравшан барои саноатикунонии босуръати Тоҷикистон тадбирҳои муҳим амалӣ мегарданд
Тоҷиддин Ҷӯразода дар қароргоҳи СММ доир ба таъсири пандемияи COVID-19 ва тағйирёбии иқлим ба соҳаи сайёҳии Тоҷикистон сухан гуфт
Саъдӣ Каримзода ва Теклу Тесфайе масъалаҳои марбут ба соҳаи кишоварзиро баррасӣ карданд
Форуми саёҳативу тиҷоратии Тоҷикистон ва Узбекистон ба ҳамкорӣ дар бахши сайёҳӣ тавсеа мебахшад
Тоҷикистон ва Узбекистон ҳамкориро дар соҳаи экология ва ҳифзи муҳити зист таҳким мебахшанд
Дар се моҳи аввали соли 2022 дар Тоҷикистон ба масоҳати 250,4 ҳазор метри мураббаъ хонаҳои истиқоматӣ сохта шуданд
Масъалаи таъсиси Фонди байналмилалии ҳифзи пиряхҳо дар Тоҷикистон мавриди баррасӣ қарор гирифт
Дар Тошканд электробус ва электротроллейбуси «Акиа Авесто»-и Тоҷикистон таваҷҷуҳи ширкатҳои хориҷиро ба худ ҷалб намуданд