Оғози сохтмони маҷмааи баландошёнаи бисёрфунксионалӣ бо меҳмонхонаи замонавии 24-ошёнаи «GRAND RUDAKI TOWER» дар шаҳри Душанбе

Сентябрь 4, 2019 10:41

ДУШАНБЕ, 04.09.2019 /АМИТ «Ховар»/. Рӯзи 4 сентябри соли равон  Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Раиси шаҳри Душанбе муҳтарам Рустами Эмомалӣ дар хиёбони Рӯдакии пойтахт барои сохтмони Маҷмааи баландошёнаи бисёрфунксионалӣ, бо ҷойгиркунии меҳмонхонаи замонавии панҷситорадори 24 ошёна ва ду адад апартаментҳои резиденсии (қароргоҳӣ) 18-ошёнаи «GRAND RUDAKI TOWER» санги асос гузоштанд.

Тавре зимни муаррифии лоиҳа иттилоъ дода шуд, иншооти мазкур бо назардошти талаботи муосири хизматрасонӣ бунёд ёфта, сохтмони он дар доираи Нақшаи генералии шаҳри Душанбе бо сатҳу сифати баланд ва талаботи муосири меъмориву шаҳрдорӣ анҷом дода мешавад. Худи бинои меҳмонхонаи панҷситорадор аз 24 ошёна иборат буда, ҳамчунин ду бинои 18-ошёнаи дигари апартаментҳои резиденсӣ низ дар шафати он бунёд хоҳад ёфт.

Иншооти мазкур аз ҷониби ҶДММ «Себистон-2018» бунёд ёфта, он дорои 141 ҳуҷра хоҳад буд ва имконияти қабули меҳмонони сатҳи олиро хоҳад дошт. Аз ҷумла, дар меҳмонхонаи панҷситорадор 2 ҳуҷраи Президентӣ, 30 ҳуҷраи люкс ва полулюкс, 20 утоқи дуҳуҷрагӣ ва 100-тои дигар ҳуҷраҳои стандартӣ бунёд мегардад. Муҳлати сохтмони ин иншооти замонавии хизматрасонӣ ду сол пешбинӣ гардидааст ва он дар рӯзҳои таҷлил аз ҷашни 30-юмин солгарди Истиқлолияти давлатӣ мавриди баҳрабардорӣ қарор хоҳад гирифт.

Зимни муаррифӣ ба Сарвари давлат муҳтарам Эмомалӣ Раҳмон иттилоъ доданд, ки маҷмааи мазкур дорои имкониятҳои васеи хизматрасонии фароғатӣ буда, тибқи тарҳи омодагардида, дар ҳудуди иншоот 2 тарабхона, 1 тӯйхона, 2 қаҳвахона, маркази дилхушии кӯдакон ва 4 адад толори маҷлисӣ низ бунёд мегарданд. Пас аз бунёд, барои мизоҷон SPA-хизматрасониҳо низ пешниҳод мегарданд, зеро дар ин ҷо бунёди 2 ҳавзи шиноварӣ, 2 кошонаи ҳусн ва 2 адад толори варзишиву солимгардонӣ дар назар дошта шудааст. Дар ошёнаҳои болоӣ дафтарҳои корӣ бо назардошти тамоми шароити муосир, ки мутобиқ ба стандартҳои байналмилалӣ хоҳад буд, бунёд гардида, осорхона, гӯшаи сайёҳӣ ва ҳунарҳои мардумӣ низ дар маҷмаа ҷой дода мешаванд. Дар иншооти мазкур ҳамчунин чор ошёнаи дигар барои таваққуфгоҳи нақлиёт пешбинӣ гардидааст.

Оғози сохтмони маҷмааи мазкур идомаи корҳои ободониву созандагӣ дар ҳудуди шаҳри Душанбе буда, туҳфаи арзандаест ба Солҳои рушди деҳот, сайёҳӣ ва ҳунарҳои мардумӣ. Зеро бунёди ин ва дигар иншооти хизматрасонӣ заминаи мусоидро барои рушди соҳаи сайёҳии мамлакат фароҳам оварда, метавонанд ба меҳмонони дохиливу хориҷӣ хизматрасониҳои сатҳи байналмилалиро пешниҳод намоянд. Дар ин баробар, бунёди иншооти мазкур дар хиёбони марказии шаҳри Душанбе бо намои зебову муосир ба ҳусни пойтахт зебогии дигар зам хоҳад кард.

Сарвари давлат муҳтарам Эмомалӣ Раҳмон зимни шиносоӣ масъулинро вазифадор намуданд, ки ба сифати корҳои сохтмонӣ таваҷуҳи аввалиндараҷа зоҳир намуда, иншоотро мувофиқи нақшаи тасдиқгардида дар муҳлати муқарраршуда сохта, мавриди баҳрабардорӣ қарор диҳанд.

Оғози сохтмони маҷмааи баландошёнаи бисёрфунксионалӣ бо меҳмонхонаи замонавии 24-ошёнаи "GRAND RUDAKI TOWER" дар шаҳри Душанбе 04.09.2019

Сентябрь 4, 2019 10:41

Хабарҳои дигари ин бахш

ЭЪЛОН: «ВАССОФИ ВАТАН». Барои рӯзноманигорон ва корбарони саҳифаҳои иҷтимоии шабакаҳои интернетӣ фестивал-озмун баргузор мешавад
Ҳангоми истифодаи хабару маводи сомона истинод ба www.khovar.tj ҳатмӣ аст!
Саҳифаҳои расмии АМИТ «Ховар» дар шабакаҳои иҷтимоӣ: facebook.com/niatkhovar, t.me/niatkhovar, youtube.com/@niat_Khovar_tj, instagram.com/niat_khovar/, twitter.com/niatkhovar, Радиои Ховар 101.5 fm, facebook.com/khovarfm/
Тандиси биринҷии чеҳраи Пешвои миллат ба Сарвари давлат Эмомалӣ Раҳмон тақдим гардид
Сарвари давлат Эмомалӣ Раҳмон дар шаҳри Душанбе дар ҳамоиши наврӯзӣ – «Корвони шодӣ» иштирок намуданд
Суханронии Пешвои миллат Эмомалӣ Раҳмон дар маросими баргузории карнавали наврӯзии «Корвони шодӣ» дар шаҳри Душанбе
Президенти Ҷумҳурии Тоҷикистон Эмомалӣ Раҳмон бо Президенти Федератсияи Русия суҳбати телефонӣ анҷом доданд
Президенти Ҷумҳурии Тоҷикистон Эмомалӣ Раҳмон ба Президенти Федератсияи Русия Владимир Путин барқияи изҳори тасаллӣ ирсол намуданд
Як қатор сарони давлатҳо ба унвони Президенти Ҷумҳурии Тоҷикистон Эмомалӣ Раҳмон ба муносибати ҷашни Наврӯзи байналмилалӣ барқияҳои табрикӣ ирсол намуданд
Масъалаи зиёд намудани сармоягузорӣ ба татбиқи Неругоҳи барқи обии «Роғун» баррасӣ гардид
Паёми шодбошии Пешвои миллат Эмомалӣ Раҳмон ба ифтихори Наврӯзи соли 2024
Президенти Ҷумҳурии Тоҷикистон Эмомалӣ Раҳмон бо Президенти Федератсияи Русия Владимир Путин суҳбати телефонӣ анҷом доданд