Ба шарафи Рӯзи забони давлатӣ дар вилояти Суғд китоби «Тулӯи ҳақиқат» рӯнамоӣ гардид

Октябрь 5, 2019 09:50

ДУШАНБЕ, 05.10.2019 /АМИТ «Ховар»/. Бахшида ба Рӯзи забони давлатӣ ва Рӯзи муаллимон дар Донишгоҳи давлатии Хуҷанд ба номи академик Бобоҷон Ғафуров бо ширкати бештар аз 200 нафар олимону устодон ва донишҷӯён маҳфили муаррифии китоби тозанашри «Тулӯи ҳақиқат» баргузор гардид. 

Китоби мазкур маҷмӯи мақолоти олимону муҳаққиқони тоҷик дар бораи китобҳои пурарзиши илмиву таърихӣ ва адабии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон буда, аз ҷониби Академияи илмҳои Ҷумҳурии Тоҷикистон бо ибтикор ва эҳтимоми Раиси Кумитаи рушди маҳали Тоҷикистон Роҳбар Қосим бо теъдоди 500 нусха дар нашриёти «Ношир» интишор шудааст.

Маҳфилро Ректори Донишгоҳи давлатии Хуҷанд ба номи академик Бобоҷон Ғафуров, профессор Ҷамшед Ҷӯразода ифтитоҳ бахшида, аз моҳият ва арзиши китоб изҳори назар намуд. Аз ҷумла зикр намуд, ки ин китоб армуғони арзандае бахшида ба 30-солагии Истиқлолияти давлатии Ҷумҳурии Тоҷикистон буда, дар мавриди шинохти ҳақиқати таърихӣ оид ба роҳи пурпечутоби миллати тоҷик дар масири таърих нақши баланд дорад.

Ба гуфтаи мавсуф, мақолоти дар китоб фароҳам омада бори дигар собит менамоянд, ки Президенти Ҷумҳурии Тоҷикистон муҳтарам Эмомалӣ Раҳмон дар саргаҳи таҳқиқи таърихи халқи тоҷик қарор доранд ва осори илмиву адабии он кас сарчашмаи мӯътамади илмӣ барои муҳаққиқони муосир маҳсуб мешавад.

Намояндаи Мақомоти иҷроияи ҳокимияти давлатии вилояти Суғд Тоҷибой Султонзода иброз дошт, ки арҷгузорӣ ба таърихи тамаддуни мамлакат, илм, адабиёт ва мақому манзалати чеҳраҳои мондагори миллат самти асосии тадқиқоти Сарвари давлат маҳсуб меёбад, ки он дар таҳкими худшиносии миллӣ ва ваҳдату истиқлолияти Ватани маҳбуб муассир аст.

Тоҷибой Султонзода нашри китобро дар арафаи Рӯзи забони тоҷикӣ фоли нек дониста, дастрас намудани онро ба хонандагон, махсусан донишҷӯёни мактабҳои олӣ муҳим арзёбӣ намуд. Ҳамзамон Тоҷибой Султонзода  муборакбодии Раиси вилояти Суғд Раҷаббой Аҳмадзодаро бахшида ба Рӯзи забони давлатӣ ва нашри китоби “Тулӯи ҳақиқат” ба самъи ҳозирин расонид.

Номзади илмҳои таърих, дотсенти Донишгоҳи давлатии Хуҷанд ба номи академик Бобоҷон Ғафуров Ҷӯрабек Исомаддинов  дар маърӯзаи пурмӯҳтавои хеш бо номи ”Пешвои миллат ва масъалаҳои таърихи миллат” оид ба мақолаҳои “Тулӯи ҳақиқат” дар мавриди таърихи давлат изҳори назар кард. Аз ҷумла, оид ба саҳми шоёни Пешвои миллат дар маърифати сарнавишти таърихии халқи тоҷик ва ташаккули мактаби таърихнигорӣ дар марҳилаи нави таърихӣ,  таҳаввули корномаҳои шахсиятҳои бузурги миллат, қаҳрамонони Тоҷикистон Садриддин Айнӣ ва академик Бобоҷон Ғафуров дар раванди таҳқиқи таърихи тоҷикон ба ҳозирин бо санадҳои мушаххас нақл кард.

Номзади илмҳои филология Мӯсо Олимҷонов зимни маърӯзаи хеш таҳти унвони “Эмомалӣ Раҳмон – ҳомӣ ва пуштибони забони тоҷикӣ” дар мавриди сиёсати давлатии забони миллӣ дар Ҷумҳурии Тоҷикистон ва нақши мондагори Пешвои миллат дар шинохти сарнавишти таърихии забони тоҷикӣ, хизматҳои  фарзандони фарзонаи миллат дар густариши забони тоҷикӣ, мақоми шоистаи забони тоҷикӣ ба унвони забони илм дар масири таърих, истиқрори мақоми таърихии забони тоҷикӣ дар даврони соҳибистиқлолии Тоҷикистон, татбиқи Қонуни ҶТ “Дар бораи забони давлатӣ дар Ҷумҳурии Тоҷикистон” ва дастуру ҳидоятҳо дар амри таъмини покизагии забони тоҷикӣ, мақом ва ҷойгоҳи он дар миёни забонҳои олам, таъмини асолат ва рисолати забони миллӣ дар шароити нави таърихӣ ва таҳкими истиқлолияти маънавии тоҷикон ҳарф зад.

Зикр шуд, ки теъдоди муайяни ин китоб ба муассисаҳои таълимиву илмӣ, китобхонаҳо ва ташкилоту муассисаҳо тақдим мешавад.

Октябрь 5, 2019 09:50

Хабарҳои дигари ин бахш

Барои мукофотонидани ғолибони Озмуни ҷумҳуриявии «Шоҳномахонӣ» 2 миллиону 660 ҳазор сомонӣ ҷудо карда мешавад
ТУҲФАИ АРЗАНДАИ ПРЕЗИДЕНТИ ТОҶИКИСТОН. Ба беш аз 57 ҳазор оилаи шаҳри Ваҳдат «Шоҳнома» тақдим мегардад
Шарҳи Амри Президенти Ҷумҳурии Тоҷикистон
Амри Президенти Ҷумҳурии Тоҷикистон
ИЛМ ДАР БАЛАНДИИ ЗИЁДА АЗ 5000 МЕТР. Дар калонтарин пиряхи Тоҷикистон — Ванҷях таҳқиқоти илмӣ гузаронида шуд
Академияи миллии илмҳои Тоҷикистон бо Донишгоҳи давлатии омӯзгории Шинҷони Чин ҳамкориро тақвият медиҳад
Ёдгориҳои нодири тамаддуни тоҷикон дар Осорхонаи миллии Чин ба намоиш гузошта шуданд
Аз ҷониби нашриёти «Адиб» чор китоб ба нашр расид
Дар Душанбе даври сеюми Озмуни ҷумҳуриявии «Фурӯғи субҳи доноӣ китоб аст» ҷамъбаст гардид
Туҳфаи арзишманди Пешвои миллат — китоби «Шоҳнома» ба ноҳияи Файзобод расид
Байни консерваторияҳои Тоҷикистон ва Чин Ёддошти тафоҳум ба имзо расид
Намояндагони Шурои байналмилалии ҳунармандӣ бо намунаҳои сӯзании Панҷакент шинос шуданд