Дар Тоҷикистон ҷаласаи сеюми вазирони сайёҳии кишварҳои узви Созмони ҳамкории иқтисодӣ доир мегардад

Октябрь 1, 2019 15:41

ДУШАНБЕ, 01.10.2019. /АМИТ «Ховар»/. 3-4 октябр дар шаҳри Ҳуҷанди вилояти Суғд ҷаласаи сеюми вазирони сайёҳии кишварҳои узви Созмони ҳамкории иқтисодӣ (ЭКО) ва коршиносони аршади он баргузор мегардад, хабар медиҳад АМИТ «Ховар» бо истинод ба Кумитаи рушди сайёҳии назди Ҳукумати Ҷумҳурии Тоҷикистон.

Дар доираи ҷаласа нахуст ҷаласаи 5-уми Гурӯҳи коршиносони сатҳи баланд (HLEG) оид ба сайёҳӣ доир гашта, изҳорот/рӯнамоиҳои кишварҳои узв муаррифӣ мегарданд. Сипас Лоиҳаи рӯзномаи ҷаласаи 3-юми вазирони сайёҳии узви ЭКО, қарорҳои ҷаласаи 2-юми вазирони ЭКО оид ба сайёҳӣ,  Нақшаи амал оид ба сайёҳӣ, таҷдид ва шарҳи Нақшаи амал оид ба экотуризм дар минтақаи ЭКО, Лоиҳаи Стратегияи минтақавии сайёҳии ЭКО, лоиҳаҳои нав дар соҳаи сайёҳӣ, интихоби пойтахти ЭКО оид ба сайёҳӣ, вусъат додани ҳамкории кишварҳои узв дар соҳаи сайёҳии тиббӣ, раводиди ЭКО барои сайёҳӣ, шабакаи операторҳои ЭКО-тур (бастаи ECO Tour), таҳияи Эъломияи Хуҷанд, макони баргузории ҷаласаи навбатӣ, тасдиқи гузориши лоиҳаи ҷаласаи 3-юми вазирон оид ба сайёҳӣ ва дигар масъалаҳои марбут ба сайёҳии кишварҳои узви ЭКО мавриди баррасӣ қарор дода мешаванд.

Минтақаи ЭКО бо масоҳати беш аз 8 миллион километри мураббаъ аз марказ ба ҷануб ва ба ҷанубу ғарби Осиё тӯл мекашад ва тақрибан 450 миллион аҳолӣ бо зебоиҳои табииву гуногуншаклии мероси таърихиву фарҳангии худ шинохта шудааст. Аз ин ҷиҳат, он дорои иқтидори бузург ва яке аз минтақаҳои асосии сайёҳии ҷаҳон маҳсуб ёфта, хотираҳои Роҳи қадимаи Абрешимро эҳё мекунад.

Мавриди зикр аст, ки соҳаи сайёҳӣ бахши муҳими иқтисодии кишварҳо мебошад ва он на танҳо манбаи муҳими мубодилаи асъор, балки омили эҷоди тиҷорати маҳаллӣ ва шуғл дар иқтисодиёти кишварҳо мебошад. Сайёҳӣ роҳи муҳимтарини мусоидат ба сулҳи ҷаҳонӣ тавассути ҳамдигарфаҳмии васеъ ва наздикшавии фарҳангӣ мебошад. Аксари кишварҳои рӯ ба инкишоф сайёҳиро ҳамчун манбаи даромад аз содирот ва воридшавии сармоя аз кишварҳои пешрафта меҳисобанд.

Стратегияҳои туризм ҳамчун ҷузъи ҷудонопазири муҳими раванди рушди иқтисодӣ таҳия карда мешаванд. Сайёҳӣ барои рафъи мушкилоти тавозуни пардохт, ташкили ҷойҳои корӣ ва баланд бардоштани даромади умумӣ манфиатҳои муҳим фароҳам меорад.

Октябрь 1, 2019 15:41

Хабарҳои дигари ин бахш

«ДУШАНБЕ-ШАҲРИ ИМКОНОТИ РУШДИ САЙЁҲИИ УСТУВОР». Таҳти чунин унвон Рӯзи ҷаҳонии сайёҳӣ таҷлил гардид
«БЕХАТАРИИ ОБӢ – АСОСИ РУШДИ УСТУВОР». Таҳти ин унвон дар Душанбе Конференсияи байналмилалии илмӣ-амалӣ доир мегардад
РОҒУН — МИНТАҚАИ САЙЁҲӢ. Дар ин бора Қарори Ҳукумати Ҷумҳурии Тоҷикистон ба тасвиб расид
Ориф Амирзода: «Маҳз бар асари гармшавии иқлим беш аз 1000 пиряхи Тоҷикистон комилан об шудаанд»
БА ИСТИҚБОЛИ ҶАШНИ 35-СОЛАГИИ ИСТИҚЛОЛИЯТИ ДАВЛАТӢ. Дар ноҳияи Рашт 5 бунгоҳи тиббӣ мавриди истифода қарор гирифт
Имконияти сайёҳии Тоҷикистон дар ЭКСПО-и сайёҳии Ҷопон муаррифӣ мегардад
Ҷаласаи навбатии Шӯро оид ба муайян намудани сатҳи камбизоатӣ ва табақаи миёнаи аҳолӣ баргузор шуд
Дар Душанбе масъалаи ҳамкорӣ бо Маркази минтақавии рушди иқтидори Хазинаи Байналмилалии Асъор баррасӣ гардид
Дар ноҳияи Мурғоб иқтидори истеҳсоли энергияи офтобӣ зиёд мешавад
Дар Душанбе Созишнома оид ба маблағгузорӣ миёни Тоҷикистон ва Ассотсиатсияи Байналмилалии Рушд ба имзо расид
Раиси Шӯрои директорони ҶДММ «Ғаюр Гурӯҳ» Акбар Асадулло: «Имрӯз вақти дар амал собит кардани ватандӯстии мо расидааст»
Бартарафсозии оқибатҳои даргириҳои марзӣ дар деҳоти Чоркуҳ ва Сурхи Исфара таҳти таваҷҷуҳи хоссаи Пешвои миллат қарор дорад