«Дил, биё як дам кунем ёд аз фалак» — таҳти чунин унвон бахшида ба Рӯзи фалак барномаи консертӣ доир мегардад

ДУШАНБЕ, 09.10.2019./АМИТ «Ховар»/. Пагоҳ, 10 октябр дар Филармонияи давлатии Тоҷикистон ба номи Акашариф Ҷӯраев ба ифтихори Рӯзи фалак таҳти унвони «Дил, биё як дам кунем ёд аз фалак» барномаи консертӣ баргузор мегардад.

Тавре аз маркази матбуоти Вазорати фарҳанги Ҷумҳурии Тоҷикистон ба хабарнигори АМИТ «Ховар» иттилоъ доданд, дар барномаи консертӣ Ҳофизи халқии Тоҷикистон Раҳматулло Ҳошимов, ансамбли фолклории “Ганҷина” ва зиёда аз 20 нафар санъаткорону сарояндагон ҳунарнамоӣ мекунанд.

Бояд гуфт, ки  маҳфуми фалак ифодагари осмон, кайҳон, сипеҳру афлок, гардун, гардиши рӯзгор, сарнавишт ва амсоли инҳо мебошад.  Аз ин лиҳоз, имрӯз жанри мусиқии фалак ҳамчун падидаи нодири ҳунарӣ дар фазои мамлакати соҳибистиқлоламон бо ҷилову садои дилнишин танинандоз гардидааст.

Ёдовар мешавем, ки 20 июли соли 1989 бо Қарори Ҳукумати Ҷумҳурии Тоҷикистон дар шаҳри Кӯлоб бо роҳбарии Давлатманд Холов ансамбли «Фалак» таъсис ёфт. 16 ноябри соли 2001 бо ташаббуси Президенти Ҷумҳурии Тоҷикистон Эмомалӣ Раҳмон ба ансамбли «Фалак» мақоми давлатӣ дода шуд ва ҳоло он дар назди Кумитаи телевизион ва радиои назди Ҳукмати ҷумҳурӣ фаъолият дорад.

Ҳамчунин  соли 2015 номинатсияи мусиқии суннатии тоҷикон- «Фалак» ба Ҷоизаи байналмиллалии «GLOBAL RATING NOMI-NATION»-и Институти рейтинги байналмиллалӣ- «INTER-NATIONAL RATING SISTEM» — ЮНЕСКО  мушарраф гардидааст.