Кормандони Кумитаи ҳолатҳои фавқулода ду нафар сайёҳи хориҷиро дар кӯҳҳои Помир наҷот доданд

ДУШАНБЕ, 05.10.2019. /АМИТ «Ховар»/. Кормандони Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ду нафар сайёҳи хориҷиро, ки ба ин мақомот сигнали  «SOS» равон карданд, наҷот доданд.

Тавре АМИТ «Ховар» бо истинод ба Кумитаи ҳолатҳои фавқулода хабар медиҳад, ин сайёҳон зану шавҳар аз Полша буда, мехостанд бо мошин тариқи роҳи Мурғоб (Тоҷикистон) ба шаҳри Ӯши Ҷумҳурии Қирғизистон бираванд.

«3 октябр, тахминан соати  14:00, ба қисми навбатдории Кумитаи ҳолатҳои фавқулода ва мудофиаи гражданӣ хабар расид, ки тахминан дар наздикии ноҳияи Қаракӯл ва Мозкӯли ноҳияи Мурғоби ВМКБ ду сайёҳи полшагӣ сигнали  «SOS» равон карданд», — гуфта мешавад дар иттилоияи Кумита.

Кормандони шуъбаи КҲФ дар ноҳияи Мурғоб ва гурӯҳи ихтиёриён аз деҳаи Қаракӯл ба ҷойи ҳодиса сафар карда, бо сайёҳон дар иртибот шуданд. «Маълум гардид, ки яке аз онҳо Богдан Гас ном дошта, 38-сола будааст ва ҳамсараш Иванна Гиришска 34 сол доштааст», — афзуд манбаъ.

Бояд гуфт, ки ин ду сайёҳ бо мошин сафар кардаанд ва роҳи онҳо аз тариқи ноҳияи Мурғоби Вилояти Мухтори Кӯҳистони Бадахшон гузашта, мебоист ба шаҳри Ӯши Қирғизистон раванд. Дар нимароҳ муҳаррики мошин аз кор мондааст. Пас аз наҷот додан онҳо гуфтанд, ки саломатанд ва ба кумаки тиббӣ ниёз надоранд.

Ёдовар шудан ба маврид аст, ки барои расонидани ёрӣ ҷиҳати таъмири мошини сайёҳон кормандони шуъбаи Кумита дар ноҳияи Мурғоб онҳоро ба деҳаи Қарокӯли ноҳия оварданд.