Талаби ришва барои иваз намудани ному насаб дар вилояти Хатлон

ДУШАНБЕ, 18.10.2019./АМИТ «Ховар»/. Агентии назорати давлатии молиявӣ ва мубориза бо коррупсияи Ҷумҳурии Тоҷикистон мутахассис-коргузори бахши Сабти асноди ҳолати шаҳрвандии ноҳияи Фархори вилояти Хатлон Х.З.-ро  барои гирифтани 1650 сомонӣ ҳамчун пора ба ҷавобгарии ҷиноятӣ кашид.

Тавре аз Агентии назорати давлатии молиявӣ ва мубориза бо коррупсия  ба АМИТ «Ховар» хабар доданд,  20 сентябри соли 2019 шаҳрванд «А» ба Агентии мазкур бо ариза муроҷиат намуд. Номбурда дар аризааш нисбат ба таъмаҷӯии  мутахассис-коргузори бахши сабти асноди ҳолати шаҳрвандии ноҳияи Фархори вилояти Хатлон Х.З.,  ки  аз ӯ барои иваз намудани ному насабаш 1650 сомонӣ талаб кардааст, шикоят намуд.

Худи ҳамон рӯз нисбат ба  Х.З. бо моддаи 324 қисми 1 Кодекси  ҷиноятии  Ҷумҳурии Тоҷикистон парвандаи ҷиноятӣ оғоз карда шуд.  Зимни гузаронидани чорабиниҳои  фаврӣ -тафтишотӣ номбурда баъди аз шаҳрванд «А» гирифтани 1650 сомонӣ дастгир  ва  далелҳои шайъӣ — маблағи мазкур аз ӯ ёфта гирифта шуд.  Тафтиши пешакии парвандаи ҷиноятӣ идома дорад.