«Вазъи забони тоҷикӣ дар минтақаҳои тоҷикнишини Осиёи Марказӣ»-таҳти чунин унвон дар Душанбе конференсияи байналмилалӣ оғоз гардид

ДУШАНБЕ, 05.10.2019 /АМИТ «Ховар»/. Ба хотири гиромидошти Рӯзи забони давлатӣ, имрӯз, 5 октябр дар Китобхонаи миллии Тоҷикистон дар мавзӯи «Вазъи забони тоҷикӣ дар минтақаҳои тоҷикнишини Осиёи Марказӣ» конференсияи байналмилалӣ доир мегардад.

Кумитаи забон ва истилоҳоти назди Ҳукумати Ҷумҳурии Тоҷикистон аз ташкилкунандагони асосии конференсия ба ҳисоб меравад.

Ба иттилои роҳбарияти Кумита, дар конференсия олимону забоншиносон аз кишварҳои Тоҷикистон, Ӯзбекистон, Қазоқистон, Федератсияи Россия ва Афғонистон иштирок намуда, фикру мулоҳизаҳои худро доир ба бузургии забони тоҷикӣ, мушкилот ва ҳифзу нигоҳдошти он дар ҷаҳони муосир иброз медоранд.

Дар ҳамоиши илмии байналмилалӣ, аз ҷумла дар мавзӯи «Забони тоҷикӣ дар Россия: таърих ва вазъи муосир», «Тамаддуни тоҷикон дар гузари замон», «Асолати забони тоҷикӣ дар Осиёи Миёна», «Хусусиятҳои таълими забони тоҷикӣ ва адабиёти тоҷикӣ дар муассисаҳои таълимии Ӯзбекистон ва Қирғизистон», «Нақши нашрияҳои тоҷикии Қирғизистон дар ростои беҳбуди ҷойгоҳи забону фарҳанги миллӣ», «Забони модарии сӯхиён тоҷикӣ буду бояд тоҷикӣ монад», «Аз таърихи дастурнависии забони тоҷикӣ», «Он чӣ аён аст», «Инъикоси мақоми байналмилалии забони тоҷикӣ дар асари Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон «Забони миллат – ҳастии миллат», «Вазъи омӯзиши забони тоҷикӣ дар Донишгоҳи давлатии забоншиносии Москва: вазифаҳои асосии Маркази забону фарҳанги тоҷикӣ» ва ғайраҳо маърӯзаҳо шунида хоҳанд шуд.