Дар Душанбе нақши сайёҳӣ дар муаррифии мавзеъҳои таърихию фарҳангӣ ва зиёратӣ баррасӣ шуд

Ноябрь 7, 2019 11:17

ДУШАНБЕ, 07.11.2019. /АМИТ «Ховар»/. Имрӯз бо ташаббуси Кумитаи рушди сайёҳии назди Ҳукумати Ҷумҳурии Тоҷикистон дар ҳамкорӣ бо Академияи илмҳои Ҷумҳурии Тоҷикистон таҳти унвони «Нақши сайёҳӣ дар муаррифии мавзеъҳои таърихию фарҳангӣ ва зиёратӣ» ҳамоиш баргузор гардид.

Тавре ба АМИТ «Ховар» аз Кумитаи рушди сайёҳӣ хабар доданд, ҳамоиши мазкур ба 25-умин солгарди рӯзи Конститутсияи Ҷумҳурии Тоҷикистон бахшида шуда, дар он роҳбарияти Кумитаи рушди сайёҳӣ, вазорату идораҳои дахлдор, ширкатҳои сайёҳӣ муассисаҳои олии таълимӣ, ки дар бахши сайёҳӣ мутахассис омода менамоянд, иштирок намуданд.

Мақсад аз ташкил ва гузаронидани ҳамоиши мазкур муаррифии имкониятҳои сайёҳӣ, бархурдор шудан аз осори таърихӣ, фарҳангӣ ва рушди сайёҳии дохилӣ мебошад.

Тибқи барномаи ҳамоиш роҳбарияти Кумитаи рушди сайёҳӣ, Вазорати фарҳанг ва Академияи илмҳо сухан гуфтанд. Директори МД “Пойгоҳи бостоншиносии Саразм” Нуринисо Худоёрова дар мавзӯи “Саҳми Пешвои муаззами миллат, Президенти Ҷумҳурии Тоҷикистон Эмомалӣ Раҳмон дар ҷаҳонишавии Саразм”, директори генералии МД “Муҷтамаи ҷумҳуриявии осорхонаҳои Кӯлоб” Ҳотам Раҷаби Асозода дар мавзӯи “Муаррифии ёдгориҳои таърихии фарҳангии минтақаи Кӯлоб ва рушди сайёҳии зиёратӣ”, директори МД “Осорхонаи миллии бостонии Тоҷикистон” Саидмурод Бобомуллоев дар мавзӯи “Муаррифии ёдгориҳои таърихӣ-фарҳангии Тоҷикистон дар рушди сайёҳӣ”, директори генералии МД Маҷмааи фарҳангии таърихии “Қалъаи Хуҷанд” Иброҳим Иброҳимов дар мавзӯи “Нақши муассисаи давлатии Қалъаи Хуҷанд дар рушди сайёҳии кишвар”, директори МД “Мамнуъгоҳи таърихӣ-фарҳангии “Қалъаи Ҳисор” Зикрулло Ҷобиров  дар мавзӯи “Маҷмааи ёдгориҳои таърихию меъмории Ҳисор дар рушди сайёҳӣ”, директори МД “Мамнӯъгоҳи таърихию фарҳангии Ҳулбук” Абдулло Хоҷаев дар мавзӯи “Ҳулбук – мавқеи он дар таблиғи фарҳанги умумибашарӣ тариқи сайёҳӣ”, директори ширкати сайёҳии “Сайри Мунк” Авазхон Сироҷов дар мавзӯи “Сайёҳии таърихию фарҳангӣ ва зиёратии минтақаи Ховалинг”, мудири МД “Осорхонаи мардумшиносӣ” Тутинисо Ашӯрмамадова дар мавзӯи “Саҳми осорхона дар ҳифз ва муаррифии ҳунарҳои мардумӣ” маърӯза намуданд.

Мавриди зикр аст, ки дар Стратегияи рушди сайёҳӣ дар Ҷумҳурии Тоҷикистон барои давраи то соли 2030 мавҷудияти мероси бойи таърихию фарҳангии Тоҷикистон омили асосии рушди сайёҳии мамлакат эътироф шудааст.

Тибқи қарори Ҳукумати Ҷумҳурии Тоҷикистон аз 12 апрели соли 2018 рўйхати иншооти сайёҳие, ки барои бунёди онҳо воридоти таҷҳизоту техника ва маводи сохтмонӣ аз андоз аз арзиши иловашуда ва боҷи гумрукӣ озод карда мешаванд, тасдиқ гардид. Ба рўйхати мазкур дар баробари дигар иншооти сайёҳӣ мавзеъҳои фарҳангию таърихӣ ва динӣ (осорхонаҳо, зиёратгоҳҳо, иншооти таърихӣ) ворид гардидаанд.

Дар раванди рушди сайёҳии дохилӣ ва байналмилалӣ дар Тоҷикистон зиёда аз 3000 ёдгории таърихию фарҳангии бақайдгирифташуда мусоидат менамоянд.

Аз ҷумла, аз ёдгориҳои таърихӣ мамнуъгоҳи таърихию фарҳангии Ҳисор, Қалъаи Хуҷанд, пойгоҳи бостоншиносии Панҷакент-Саразм, муҷтамаи ҷумҳуриявии осорхонаҳои Кўлоб, осорхонаи ҷумҳуриявии таърихию кишваршиносии ба номи Абўабдулло Рўдакӣ, маҷмааи таърихию фарҳангии Панҷрӯд, мамнуъгоҳи таърихию фарҳангии Ҳулбук, “Қалъаи Карон” ва Осорхонаи миллӣ мояи таваҷҷуҳи сайёҳон гардидааст.

Кумитаи рушди сайёҳӣ дар доираи салоҳияти худ тибқи ҳадафҳои Стратегияи рушди сайёҳӣ дар Ҷумҳурии Тоҷикистон барои давраи то соли 2030 бо ташкилоту созмонҳои байналмилалӣ дар самти мутобиқгардонии маҳсулоти сайёҳии мамлакат ба стандартҳои байналмилалӣ ҳамкориро боз ҳам бештар намуда истодааст.

Қобили зикр аст, ки чор мавзеи таърихию сайёҳии мамлакат, аз ҷумла ёдгориҳои таърихии “Хоҷа Машҳад”, “Чилучорчашма”, “Ҳулбук” дар вилояти Хатлон ва Қалъаи “Ямчун” дар ВМКБ дар ҳамкорӣ бо Бонки ҷаҳонӣ бозсозӣ карда шуда, ба сатҳи байналмилалӣ расонида мешаванд. Ҳадаф аз он, амалӣ намудани тарҳи рушди деҳот буда, чорабиниҳо асосан барои бозсозии роҳҳои назди ин ёдгориҳои таърихӣ ва навиштаҷот бо се забон, бунёди хонаҳои қабули сайёҳон, меҳмонхонаҳои хурд ва дигар хизматрасониҳои муосир ба сайёҳони дохилию хориҷӣ пешбинӣ шудаанд.

Дар интиҳои ҳамоиши мазкур мулоҳизоти иштирокчиён шунида шуда, вобаста ба масъалаҳои пешниҳодшуда муҳокимаронӣ сурат гирифт.

Ноябрь 7, 2019 11:17

Хабарҳои дигари ин бахш

НАМОИШГОҲИ БАЙНАЛМИЛАЛИИ САЙЁҲИИ ITB BERLIN 2023. Ҳайати Тоҷикистон барои иштирок дар он омодагӣ мебинад
Дар Суғд 39 нафар ғолиби Озмуни вилоятии «Хомаи созанда-2022» гардид
6 феврал «Амонатбонк», Хадамоти иҷро, Маркази миллии тестӣ ва Иттифоқи «Тоҷикматлубот» нишасти матбуотӣ баргузор менамоянд
«ТОҶИКИСТОН-ВАТАНИ АЗИЗИ МАН». Имсол дар ин озмуни ҷумҳуриявӣ рассомон ва дизайнерон иштирок мекунанд
««ТОҶИКОН» – ОИНАИ ТАЪРИХИ МИЛЛАТ». Шоҳҷоиза барои ғолибон дар ҳар гурӯҳи ин озмуни ҷумҳуриявӣ 70 ҳазор сомонӣ пешбинӣ шудааст
Пагоҳ Кумитаи дин, танзими анъана ва ҷашну маросим, Агентии назорати маводи нашъаовар, Агентии «Тоҷикстандарт», КВД «Хоҷагии манзилию коммуналӣ» ва КВД «Тоҷиксуғурта» нишасти матбуотӣ баргузор менамоянд
Хизматчиёни давлатии Тоҷикистон дар шаҳри Беппуи Ҷопон фарҳанги миллати тоҷикро муаррифӣ карданд
«ТОҶИКИСТОН-ГАВҲАРИ КАШФНОШУДА ДАР САМОИ САЙЁҲӢ». Дар Душанбе Форум ва Намоишгоҳи байналмилалиии сайёҳӣ доир карда мешаванд
Дар озмуни ҷумҳуриявии ««Тоҷикон» – оинаи таърихи миллат» иштирок менамоем
«ТАВАҶҶУҲИ ҲАКАМОН» БА «ДОВ». Филми Тоҷикистон дар Кинофестивали байналмилалӣ соҳиби ҷоиза гардид
Соли 2022 беш аз 138 ҳазор нафар сайёҳон аз мавзеъҳои таърихию фарҳангии вилояти Суғд дидан карданд
АРҶ МЕГУЗОРЕМ. Дар Бохтар Осорхонаи Ҳунарпешаи халқии Тоҷикистон Аловуддин Абдуллозода таъсис меёбад