Таҳти раёсати Сарвазири мамлакат Қоҳир Расулзода ҷаласаи Кумитаи тадорукот оид ба омодагӣ ва баргузории ду чорабинии сатҳи баланди байналмилалӣ доир гардид

ДУШАНБЕ, 25.11.2019. /АМИТ «Ховар»/. Имрўз таҳти раёсати Сарвазири мамлакат Қоҳир Расулзода ҷаласаи якуми Кумитаи тадорукот оид ба омодагӣ ва баргузории Конфренсияи дуюми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018-2028» ва ҷаласаи Шўрои сарони давлатҳои аъзои Созмони Ҳамкории Шанхай доир гашт.

Дар ҷаласа ҷараёни татбиқи нақшаи чорабиниҳо оид ба омодагӣ ва баргузории Конфренсияи дуюми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018-2028» ва ҷаласаи Шўрои сарони давлатҳои аъзои Созмони Ҳамкории Шанхай ва дигар масъалаҳои вобаста ба ин чорабиниҳои сатҳи байналмилалӣ мавриди таҳлилу баррасӣ қарор дода шуданд.

Тавре таъкид гардид, Конфренсияи дуюми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018-2028» соли 2020 ва ҷаласаи Шўрои сарони давлатҳои аъзои Созмони Ҳамкории Шанхай соли 2021 дар шаҳри Душанбе баргузор мегарданд.