«Беҳтарин шоҳмотбози сол». Дар Бадахшон 40 нафар барои ба даст овардани ин унвон талош меварзанд

ДУШАНБЕ, 11.12.2019 /АМИТ «Ховар»/. Дар шаҳри Хоруғи Вилояти Мухтори Кӯҳистони Бадахшон  мусобиқаи «Беҳтарин шоҳмотбози сол» оғоз гардид. Баъди як ҳафта маълум мегардад, ки кадом иштирокчӣ  шоҳмотбози рақами яки вилоят эълон мегардад. Ин мусобиқа бо ибтикори ширкати «Шарқ Ко» ҳамасола моҳи декабр баргузор мешавад.

Намояндаи ширкати мазкур Иқбол Нурмамадов гуфт, ки “баробари ба роҳ мондани дарси шоҳмот дар муассисаҳои таълимии шаҳри Хоруғ теъдоди довталабони мусобиқа рӯ ба афзоиш ниҳод. Имсол бештар аз 80 нафар шоҳмотбози ҷавон дархост пешниҳод намуданд ва ҳайати ҳакамон 20 нафар фаъолашро интихоб карданд”.

Сардовари мусобиқа Вафо Нурмамадов ҷиҳати фароҳам овардани шароити мусоид барои варзишгарон ва дастгирии пайвастаи шоҳмотбозони навраси вилоят  ба ширкати «Шарқ Ко» изҳори сипос карда, гуфт, ки “бо кумаки ин ширкат шоҳмотбозони вилоят пайваста дар мусобиқаҳои ҷумҳуриявию байналмилалӣ ширкат менамоянд. Соли гузашта Алишер Мамадаёзов шоҳмотбози беҳтарини вилоят  шумурда шуд. Дар мусобиқаи имсола ду нафар аз шоҳмотбозони маъруфи ҷумҳурӣ Олуча Ҷумъаев ва Тоҳир Мақсудшоев низ ширкат мекунанд ва аз ин рӯ мусобиқа ҷолибтар сурат хоҳад гирифт”.

Бояд гуфт, ки ба ғолибони мусобиқа дар баробари ҷоизаҳои асосӣ ҳамчунин мукофоти пулӣ низ тақдим карда мешаванд.