Бонки ҷаҳонӣ татбиқи муваффақонаи низоми интиқоли пулро дар Тоҷикистон зикр намуд

ДУШАНБЕ, 16.12.2019. /АМИТ «Ховар»/.  Дар Душанбе мулоқоти муовини Раиси Бонки миллии Тоҷикистон Ҳамидулло Машрабзода бо намояндагони Бонки ҷаҳонӣ доир гардид, хабар медиҳад АМИТ «Ховар» бо истинод ба Бонки миллии Тоҷикистон.

Мулоқоти ҷонибҳо дар доираи татбиқи лоиҳаи «Баланд бардоштани рақобатнокии бахши хусусӣ» баргузор шуд.

Зимни мулоқот намояндаи Бонки ҷаҳонӣ Ян-Петер Олтерс аз ҳамкории сатҳи олии Ҳукумати Ҷумҳурии Тоҷикистон ва Бонки миллии Тоҷикистон бо Бонки ҷаҳонӣ изҳори қаноатмандӣ кард.

Намояндаи Бонки ҷаҳонӣ роҳандозии лоиҳаро мусбат арзёбӣ намуд.

«Низомҳои татбиқшуда барои беҳтар гардидани хизматрасониҳои бонкӣ, рушди бахши хусусӣ ва баланд бардоштани мавқеи мамлакат  дар рейтинги «Пешбурди соҳибкорӣ» мусоидат менамоянд», — зикр намуд ӯ.

Ҳамидулло Машрабзода ҳамкории судманди Бонки миллии Тоҷикистон ва Бонки ҷаҳониро зикр намуд.

Дар баробари ин, зимни мулоқот ба рушди бахши бонкдорӣ ва ҷорӣ намудани низоми муваффақи автоматишудаи байнибонкии интиқоли маблағҳо таваҷҷуҳ зоҳир гардид.

Ҷонибҳо бар он мувофиқ буданд, ки низомҳои татбиқшуда инфрасохтори бахши бонкиро устувор гардонида, барои пешниҳод намудани хизматрасониҳои нави пардохтӣ аз ҷониби ташкилотҳои қарзии молиявӣ мусоидат менамоянд.