Дар Чин теъдоди фавтидагон аз коронавирус ба 170 нафар расидааст

ДУШАНБЕ, 30.01.2020 /АМИТ «Ховар»/. Теъдоди қурбониёни коронавирус дар Чин ба 170 нафар расида,  шумораи гирифторони ин беморӣ  аз 7711 зиёд гаштааст. Ҳамзамон аввалин ҳолати сироятёбӣ  дар Тибет ба қайд гирифта шудааст. Тавре АМИТ « Ховар» бо истинод ба «РИА Новости» хабар медиҳад, дар ин бора  Кумитаи давлатии  тандурустии Чин иттилоъ додааст.  

Тибет  охирин   минтақаи ин кишвар аст, ки он ҷо қаблан бемории илтиҳоби шуш, ки   бо сабаби пайдо шудани навъи нави коронавирус рух додааст, ба қайд  гирифта нашуда буд.

Дар Иттиҳоди Аврупо 9 ҳолати гирифторӣ ба ин бемориро тасдиқ намуданд.

Як рӯз пеш расман оид ба 5974 нафар бемор ва 132  нафар  фавтида   хабар дода буданд.

Давоми як шабонарӯз  ба ҳукуматдорон  аз  1737 ҳолати  нави ин беморӣ хабар додаанд, ҳамчунин 38 ҳодисаи фавти одамон қайд  гардидааст (38 нафар дар музофоти Ҳубей ва 1 нафар дар Сичуан).   Давоми як шабонарӯз 124  нафар аз беморхона ҷавоб  шудаанд.

Авҷ гирифтани бемории илтиҳоби шуш дар шаҳри Ухани Чин, воқеъ дар  қисми марказии  кишвар  (музофоти Хубей), ки барангезандаи он  навъи нави коронавирус 2019-nCoV  гаштааст, ҳанӯз моҳи декабр оғоз шудааст. Берун аз ҳудуди Чин  ҳолатҳои  сироятшавӣ  ҳамчунин дар  Гонконг, Макао, Тайван,  инчунин дар Тайланд, Япония, Кореяи Ҷанубӣ, ИМА, Канада, Ветнам, Сингапур, Непал, Франсия, Австралия, Малайзия, Германия ва  Финландия сабт гаштаанд.