«IRS»: ЭҲТИЁТ! Бинобар барфрезии сахт ва тармафароӣ ҳаракат дар роҳи мошингарди Душанбе-Чаноқ муваққатан қатъ гардид

Январь 3, 2020 10:15

ДУШАНБЕ, 03.01.2020. /АМИТ «Ховар»/.  Тавре қаблан иттилоъ додем, субҳи дирӯз бинобар шадид ва беист будани бориши барф ва тармафароии зиёд, ҳаракати ҳама намуди воситаҳои нақлиёт ба воситаи роҳи мошингарди ДушанбеЧаноқ муваққатан қатъ карда шуд. Айни ҳол бориши барф ва фаромадани тарма дар масири роҳ идома дошта, шурӯъ аз километри 31-ум ҳолати роҳ нигаронкунанда аст. Ҳоло бартарафсозии паёмадҳои тармафароӣ идома дошта, роҳбарияти филиали Ширкат, масъулини Вазорати нақлиёт, раёсати БДА ВКД ва Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон дар минтақа қарор доранд. Дар ин бора ба хабарнигори  АМИТ «Ховар» сардори маркази матбуоти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон Далери Абдулло хабар дод.

Бино ба иттилои Далери Абдулло, бориши барф дар роҳи мошингарди Душанбе-Чаноқ ҳафтаи гузашта шурӯъ гардида, рӯз то рӯз шадидтар шуда истодааст. Дар робита ба ин, кормандони филиали Ширкати саҳомии “Инновейтив Роуд Солюшнз ЛТД” фавран тармаҳоро бартараф, роҳро аз барф тоза ва онро бо маводи зиддилағжиш коркард карда истодаанд. Муҳим он аст, ки ин раванд зери назорати ҷиддии роҳбарияти филиали ширкат қарор дошта, имконияти мавҷуда самаранок истифода мешавад.

Ба иттилои  манбаъ, мушкилӣ асосан дар километри 48-73 мавҷуд аст, ки хавфи тармафароӣ ва бориши пуршиддати барф дар он ҷо хеле зиёд ба амал меояд. Сарфи назар аз ин, кормандони филиали ширкат ҳамарӯза аз субҳи барвақт ба тоза кардани роҳ шурӯъ карда, онро бо моддаҳои зиддилағжиш коркард менамоянд. Дар маҷмӯъ, дар аксар қитъаҳои роҳи Душанбе – Чаноқ баландии барф зиёд буда, дар ҳолати зарурӣ маҳдуд кардани ҳаракати воситаҳои нақлиёт дар навбати аввал ба бехатарии ронандагону мусофирон рабт дорад.

Роҳбарияти филиали ширкат таъмини бехатарии шаҳрвандонро аз ҳама болотар дониста, дар сурати ба вуҷуд омадани эҳтимоли хатар ба ҳаёти ронандагон ва мусофирон ҳаракати тамоми намуди воситаҳои нақлиётро муваққатан бозмедоранд.

Дар робита ба ин аз шаҳрвандон даъват ба амал оварда мешавад, ки муқаррароти аз ҷониби филиали ширкат дар ҳамкорӣ бо сохторҳои дахлдор, аз ҷумла, Вазорати нақлиёт, БДА ВКД ҶТ, Кумитаи ҳолатҳои фавқулода ва мудофиаи гражданӣ ҷоришударо ба эътибор гиранд ва худро эҳтиёт кунанд.

Боварӣ дорем, ки ронандагону мусофирони гиромӣ ба иқдоми мазкур, ки идомаи мантиқии корҳои амалишуда дар самти таъмини ҳаракати муназзаму бехатари воситаҳои нақлиёт дар роҳи зикршуда маҳсуб мешавад, бо ҳамдигарфаҳмӣ муносибат хоҳанд кард,- изҳор дошт сардори маркази матбуоти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон Далери Абдулло.

Баробари кушода шудани роҳ маълумот иловатан пешниҳод мегардад.

Январь 3, 2020 10:15

Хабарҳои дигари ин бахш

Одатҳои бад яке аз омилҳои сар задани бемории саратон мебошад
Шумораи аъзои Ҳизби Халқии Демократии Тоҷикистон дар шаҳри Душанбе беш аз 84,4 ҳазор нафарро ташкил медиҳад
Вобаста ба ҳамкории байналмилалӣ ва тамоюли иҷрои маҷбурии санадҳои судӣ конференсияи байналмилалӣ доир гардид
Бо дастури Пешвои миллат Эмомалӣ Раҳмон 47 шаҳрванди Тоҷикистон аз Сурия ба Ватан баргардонида шуд
«ТОБИСТОН- 2024». Дар Душанбе ҷаласаи ситоди ҷумҳуриявӣ доир шуд
Дар Маҷмааи тандурустии «Истиқлол» табибони Тоҷикистон ва Эрон амалиёти мураккаби ҷарроҳӣ анҷом доданд
Моҳи май Озмуни ҷумҳуриявии «Оилаи намунавӣ» дар шаҳри Душанбе ҷамъбаст мегардад
Дар шаҳри Исфара сел талафот ва харобӣ ба амал наовардааст
Бахшида ба оғози Ҳафтаи аврупоии иммунизатсия дар Ҷумҳурии Тоҷикистон ҳамоиш баргузор шуд
СОЛИ МАЪРИФАТИ ҲУҚУҚӢ. Дар Муассисаи давлатии «Маркази миллии патенту иттилоот» ҳамоиш доир гардид
Дар ноҳияи Рӯшон барои пешгирӣ ва рафъи оқибатҳои офатҳои табиӣ машқи мукаммал гузаронида шуд
ДАЪВАТИ ҶАВОНОН БА ОМӮЗИШИ ИЛМ ВА КАСБУ ҲУНАР. Дар ноҳияи Муъминобод оид ба ин мавзуъ вохӯриҳо доир мешаванд