Намояндаи ҶДММ «Рухом» Эраҷ Мунавваров — ғолиби ҷойи якуми Озмуни шаҳрии «Ҳунарҳои ороишӣ аз санг»

Январь 24, 2020 16:30

ДУШАНБЕ, 24.01.2020 /АМИТ «Ховар»/. Дар маросими ҷамъбасти  Озмуни шаҳрии «Ҳунарҳои ороишӣ  аз санг»  намояндаи  ноҳияи Исмоили  Сомонӣ аз ҶДММ  «Рухом» Эраҷ Мунавваров бо гирифтани 276 хол  ба ҷойи якум мушарраф гардид. Намояндаи  ноҳияи Фирдавсӣ
аз ҶДММ   «Асрори санг»   Шарифи Далер  бо  гирифтани 269 хол  ҷойи дуюм ва ҳунарманд аз ноҳияи Фирдавсӣ  Покизамоҳ Руҳуллоева бо 253 хол  мақоми сеюмро ноил гардиданд.

Тавре қаблан хабар дода будем, имрӯз бо ташаббуси мақомоти иҷроияи ҳокимияти давлатӣ дар шаҳри Душанбе  дар Муассисаи давлатии «Душанбе-Плаза» даври ҷамъбастии  озмуни мазкур  баргузор гардид.

Ҳамчунин ҳунармандон  аз ноҳияи Фирдавсӣ  Маҳмуд Бобоев  ва намояндаи   ноҳияи Исмоили  Сомонӣ аз ҶДММ  «Каром Гавҳар Нигор» Нурмуҳаммад   Собиров  барои иштироки фаъолонаашон дар озмун  бо сипосномаҳои мақомоти иҷроияи ҳокимияти давлатии шаҳри Душанбе сарфароз гардонида шуданд.

Тавре  мухбири АМИТ «Ховар»  хабар  медиҳад, дар ҷамъбасти озмуни  мазкур беҳтарин ҳунармандони соҳа аз  чор ноҳияи пойтахт маҳсули дасти хешро манзури  ҳакамон ва иштирокдорон  намуданд.

Намояндагони кумитаи тадорукоти озмун  аз намоиши омодакардаи ҳунармандони пойтахт дидан намуда, ба маҳорати ҳар  кадоми онҳо баҳои сазовор доданд.

Муовини Раиси шаҳри Душанбе Мавсума Муинӣ  зикр кард, ки   озмуни мазкур дар асоси  қарори  Раиси шаҳр Рустами Эмомалӣ ҷиҳати иҷрои  банди 19-и «Ҷадвали баргузории фестивал, намоиш, ид ва озмунҳои анъана ва ҳунарҳои мардумӣ дар Ҷумҳурии Тоҷикистон барои солҳои 2019-2021», ки бо Амри Президенти Ҷумҳурии Тоҷикистон аз 13 декабри соли 2018  тасдиқ гардидааст,  роҳандозӣ  шуд.

Таъкид гардид, ки  мақсад аз баргузории озмун  эҳёю рушди ҳунарҳои мардумӣ, аз ҷумла сохтани маснуот ва коркарди сангҳои қиматбаҳою ороишии миллӣ, тарғибу ташвиқи фарҳанги  ин ҳунари қадимӣ, ба он ворид намудани  шаклу усулҳои муосир  ва тарбияи насли нави ҳунармандони соҳа мебошад.

Ҳамзамон  ин озмун барои ҳавасмандгардонӣ, ихтироъкорӣ, тақвияти фаъолияти пешбурди навоварӣ дар соҳа ва баланд бардоштани қобилияти рақобатпазирии маснуоти аз сангҳои қиматбаҳою ороишии истеҳсолгардида равона гардидааст.

Дар фарҷоми маросим аз ҷониби намояндагони мақомоти иҷроияи ҳокимияти давлатии шаҳри Душанбе ба иштирокчиён диплому туҳфаҳои хотиравӣ тақдим карда шуд.

Хотиррасон мешавем, ки Озмуни «Ҳунарҳои ороишӣ аз санг» тибқи низомнома, ки аз ҷониби Кумитаи рушди сайёҳии назди Ҳукумати Ҷумҳурии Тоҷикистон аз 2 апрели соли 2019 тасдиқ шудааст,  роҳандозӣ мегардад.

Озмуни мазкур дар се давр- ноҳиявӣ,  вилоятӣ,  инчунин ҷумҳуриявӣ доир  мешавад.

Бояд гуфт, ки пагоҳ, 25 январ дар корхонаи “Зари Тоҷик”-и шаҳри Душанбе даври ҷумҳуриявии Озмуни «Ҳунарҳои ороишӣ аз санг» сурат мегирад.

Дар он   ғолибони ин озмун аз шаҳру ноҳияҳои ҷумҳурӣ  миёни ҳам сабқат менамоянд.

 

Январь 24, 2020 16:30

Хабарҳои дигари ин бахш

Дар даромадгоҳи дараи Камароб Маркази хизматрасонии сайёҳӣ ба истифода дода шуд
Дар Душанбе даври дуюми Озмуни ҷумҳуриявии «Нонпазӣ ва маҳсулоти нонӣ, қаннодӣ, ҳалвопазӣ, шириниҳои миллӣ ва муосир» доир карда мешавад
Раиси шаҳри Душанбе Рустами Эмомалӣ бо Ҳокими шаҳри Остона Женис Касимбек мулоқот намуданд
Дар Душанбе шумораи умумии воситаҳои нақлиёти мусофирбар 20 фоиз зиёд карда мешавад
Донишгоҳи байналмилалии сайёҳӣ ва соҳибкории Тоҷикистон ҳамкориро бо ширкатҳои хориҷӣ тақвият мебахшад
Рустами Эмомалӣ: «80 фоизи таълимгирандагони таълимоти ғайриқонунии диниро ҷавонони то 30-сола ташкил медиҳанд»
Рустами Эмомалӣ: «Корҳо дар самти пешгирӣ ва коҳиш додани сатҳи амалҳои коррупсионӣ бояд тақвият дода шаванд»
Мотосиклронҳои «Ралли Осиёи Марказӣ-2025»-ро дар Тоҷикистон истиқбол гирифтанд
Имрӯз таҳти роҳбарии Раиси шаҳри Душанбе Рустами Эмомалӣ ҷаласаи назоратӣ бо кормандони мақомоти ҳифзи ҳуқуқи пойтахт баргузор гардид
Нишасти муштарак байни роҳбарони ширкатҳои сайёҳии Тоҷикистон ва Эрон баргузор шуд
Ҷаласаи чоруми Гурӯҳи кории ҷумҳуриявӣ дар самти рушди сайёҳӣ доир шуд
Дар Бадахшон Форуми байналмилалии сайёҳӣ баргузор гардид