Ҳолати тармафароӣ дар километри 62 ва 69-и роҳи нақлиётии Душанбе-Айнӣ

ДУШАНБЕ, 02.01.2020 /АМИТ «Ховар»/. Бинобар сабаби бориши зиёди борон дар роҳҳои кӯҳӣ, хатари тармафароӣ ва сангрезиш боқӣ мондааст.

«Давоми як шабонарӯзи гузашта, дар километри 62 ва 69-уми  роҳи  нақлиётии Душанбе – Айнӣ  ҳолати фаромадани тарма ба қайд гирифта шуд. Хадамоти роҳсозии «IRS» ва наҷотдиҳандагони Кумитаи ҳолатҳои фавқулода ва мудофиаи граждании ҶТ барои бартарафсозии оқибатҳои офати табиӣ  кор бурда истодаанд», — зикр намуданд дар идораи наҷотдиҳӣ.

Дар КҲФ ва МГ ҶТ ҳамчунин иброз доштанд, ки  бо мақсади таъмини бехатарии ронандагон дар фасли сармо  ва  сари вақт мадад намудан дар ҳолатҳои фавқулода минтақаҳои тармафарои роҳҳо аз ҷониби кормандони наҷотдиҳии фаврӣ  мунтазам нигоҳбонӣ карда мешаванд.  Чунин тадбирҳо  дар давраи ҳолатҳои  фавқулода, ки хавфи боридани  барфу  сардиҳо пеш меояд, заруранд.

Дар робита ба ин, Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон  бори дигар аз аҳолӣ бо исрор хоҳиш менамояд, ки аз сафар ба минтақаҳои  хавфноки тармафаро худдорӣ намуда, ҳушёру эҳтиёткор бошанд.

«Дар ҳолати рух додани ҳолатҳои  фавқулода  ё ягон ҳодисаи нохуш дар роҳҳо шаҳрвандон метавонанд ба навбатдори хадамоти фаврии  Кумитаи мазкур бо рақамҳои зерин муроҷиат намоянд:  93 880 28 19, 221-91-19, 223-13-11» , — иброз намуданд дар Кумита.

Акс аз бойгонӣ