«Паём – дастур ва роҳнамои имрӯзу фардо». Таҳти чунин унвон ҷаласаи кормандони Осорхонаи миллии Тоҷикистон сурат гирифт

ДУШАНБЕ, 10.01.2020 /АМИТ «Ховар»/.  Паёми имсолаи Пешвои миллат ҳамчун роҳнамо ва дастури амиқу дақиқ барои фаъолияти ҳар  корманди Осорхонаи миллии Тоҷикистон ҷиҳати ҳифзу нигоҳдорӣ ва тарғибу ташвиқи мероси таърихӣ-фарҳангии мамлакати азизамон нақши муҳим дорад. Ин нуктаро имрӯз муовини якуми директори Осорхонаи миллии Тоҷикистон Зафаршо Иброҳимзода дар ҷаласаи васеъ таҳти унвони «Паём – роҳнамои имрӯзу фардо», ки  миёни кормандони Муассисаи давлатии “Осорхонаи миллии Тоҷикистон” баргузор гардид, зикр намуд.

Сардори шуъбаи илмӣ-методии Осорхонаи миллии Тоҷикистон Алишер Зарипов ба хабарнигори АМИТ «Ховар»  иттилоъ дод, ки ҳамоиш бо мақсади омӯзиш, натиҷагирӣ ва баҳрабардорӣ аз нуктаҳои муҳими Паёми Пешвои миллат муҳтарам Эмомалӣ Раҳмон, ки 26 декабри соли 2019 ба Маҷлиси Олии Ҷумҳурии Тоҷикистон ироа гардид,  доир гардид.

Ходимони илмии Осорхона андешаву бардоштҳои хешро аз Паём иброз дошта, зикр намуданд, ки баҳри амалӣ намудани бандҳои асосии Паёми Сарвари давлат тамоми саъю кӯшишро ба харҷ медиҳанд.

Дар фарҷоми ҷаласа муовини якуми директори Осорхонаи миллии Тоҷикистон Зафаршо Иброҳимзода аз кормандон даъват ба амал овард, ки барои омодагӣ ба истиқболи ҷашни 5500-солагии шаҳри Саразми бостонӣ баргузор намудани намоишҳо, ташвиқу тарғиби мероси таърихию фарҳангӣ ва ҷалби ҳарчи бештари меҳмонону сайёҳони хориҷӣ ба Осорхонаро мавриди омӯзиш ва баҳрабардории пайваста қарор диҳанд.