Шумораи сироятёфтагони коронавирус дар Чин ба 1287 нафар расид

ДУШАНБЕ, 25.01.2020 /АМИТ «Ховар»/. Шумораи  сироятёфтагон аз навъи нави коронавирус дар Чин ба 1287 нафар расида, аз ин теъдод 41 нафар вафот кардааст. Тавре АМИТ «Ховар» хабар медиҳад, дар ин бора «РИА Новости» бо истинод ба Кумитаи давлатии тандурустии Чин иттилоъ дод.

Қаблан дар бораи 830 бемор ва 26 фавтида расман иттилоъ расида буд.

«Ба ҳолати нимашаби 24 январ, дар 29 музофот ва шаҳр 1287 ҳодисаи тасдиқшудаи илтиҳоби шуш (пневмония) бар асари коронавирус ба қайд гирифта шуда, аз ин шумора 237 кас дар ҳолати вазнин қарор доранд ва 41 каси дигар  (39 нафар дар музофоти Ҳубей, 1 нафар дар музофоти Ҳебэй, 1 тан дар музофоти Ҳейлонгҷян) вафот кардаанд», — гуфта мешавад дар гузориш.

Илова бар ин, 38 нафар бемороне, ки табобат гирифта буданд, аз беморхонаҳо ҷавоб дода шуданд. Дар 20 музофот 1965 ҳодиса бо гумони коронавирус ба қайд гирифта шудаанд. Ин вирус дар 30 минтақаи Чин паҳн гардидааст.

Айни ҳол, 13 967 нафар, ки бо беморон робитаи наздик доштанд, таҳти назорати тиббӣ қарор доранд.

Берун аз қаламрави Чин панҷ ҳолати сироят дар Ҳонконг, ду ҳолат дар Макао, се ҳолат дар Тайван, чор ҳолат дар Таиланд (ду бемор аллакай ҷавоб шудаанд), ду ҳолат дар Япония (як бемор ҷавоб шудааст), ду ҳолат дар Кореяи Ҷанубӣ, ду ҳолат дар ИМА, се ҳолат дар Ветнам, се ҳолат дар Сингапур, як ҳолат дар Непал ва ду ҳолат дар Франсия ба қайд гирифта шудаанд.

31 декабри соли 2019 мақомоти Чин ба Созмони умумиҷаҳонии тандурустӣ дар бораи хуруҷи бемории илтиҳоби шуш (пневмония)-и номаълум дар шаҳри Вуҳан, воқеъ дар қисми марказии ин кишвар хабар доданд. Коршиносон ангезандаи бемориро муайян карданд, ки ин коронавируси 2019-nCoV мебошад.