Абдулаҳад Хоҷазода: «Ба ҷамъиятҳои истифодабарандаи чарогоҳҳо 216 адад трактор дастрас гардид»

ДУШАНБЕ, 14.02.2020. /АМИТ «Ховар»/. Аз оғози татбиқи лоиҳа ба ҷамъиятҳои истифодабарандагони чарогоҳи ноҳияҳои мамлакат 216 адад  трактори тамғаи  гуногун дастрас карда шуд. Тракторҳо ҷиҳати сари вақт кишт ва ҷамъоварӣ намудани зироати кишоварзӣ, инчунин мустаҳкам намудани пойгоҳи  истеҳсоли хӯроки чорво ва барқарорсозии роҳҳои чорвогузар дастраси ҷамъиятҳои мазкур  гардидаанд. Дар ин бора директори Муассисаи давлатии «Маркази идораи лоиҳаи «Рушди чорводорӣ ва чарогоҳҳо» Абдулаҳад Хоҷазода имрӯз зимни  нишасти хабарӣ дар шаҳри Душанбе ба хабарнигорон иттилоъ дод.

«Ғайр аз ин, ба ҷамъиятҳои зикргардида техника ва таҷҳизоти  кишоварзӣ, аз ҷумла, 4 адад комбайни ғалладарав, 8 адад борбардори фронталӣ, 10 адад эксковатор, 163 адад ядакҳои тракторӣ ва 1 ҳазору 842 мошинолоти гуногуни кишоварзӣ дастрас карда шуданд»,- афзуд  Абдулаҳад Хоҷазода.

Гуфта мешавад, ки тибқи талаботи Қонуни Ҷумҳурии Тоҷикистон «Дар бораи чарогоҳ» аз ҷониби мутахассисони Маркази идораи лоиҳаи «Рушди чорводорӣ ва чарогоҳҳо» дар 194 деҳаи интихобгардидаи ноҳияҳои зерҳадаф ҷамъиятҳои чарогоҳистифодабарандагон таъсис дода шуд.

Лоиҳаи «Рушди чорводорӣ ва чарогоҳҳо» аз ҷониби Фонди байналмилалии рушди кишоварзӣ маблағгузорӣ шуда, мақсади асосии он паст намудани сатҳи камбизоатии аҳолии ноҳияҳои фарогир мебошад.

Ҳоло марҳилаи дуюми Лоиҳа мавриди амал қарор гирифта, он ноҳияҳои Восеъ, Данғара, ва Мир Саид Алии Ҳамадонӣ, Фархор ва шаҳри Кӯлобро дар бар  мегирад.