Ҷамшед Ғанизода: «Имсол донишкада нақша дорад, ки довталабонро ба зинаи доктор PhD аз рӯйи равияи «Санъатшиносӣ» қабул намояд»

ДУШАНБЕ, 07.02.2020. /АМИТ «Ховар»/.  Соли 2020 донишкада нақша дорад, ки довталабонро ба зинаи доктор PhD  аз рӯйи равияи «Санъатшиносӣ» қабул намояд.

Барои таҳким додани муносибатҳои фарҳангӣ бо муассисаҳои олии хориҷи мамлакат омӯзгорони донишкада аз кафедраҳои «Мусаввирӣ ва ҳайкалтарошӣ» ва «Санъатшиносӣ» дар Симпозиуми байналмилалии санъати ҳайкалтарошӣ- «Восхождения» ва конфронсҳои илмӣ дар Ӯзбекистон ва Арманистон фаъолона иштирок намуданд.

Ин нуктаро имрӯз зимни нишасти матбуотӣ ректори Донишкадаи давлатии санъати тасвирӣ ва дизайни Тоҷикистон Ҷамшед Ғанизода ба хабарнигорон иброз намуд.

Ҷ.Ғанизода зикр кард, ки айни  замон теъдоди муҳассилини  донишкада 1592 нафарро ташкил дода, аз ин шумора 22 нафарашон донишҷӯёни хориҷӣ мебошанд. Донишҷӯёни хориҷӣ аз Қирғизистон, Россия, Ӯзбекистон ва Чин буда, тариқи бурсияҳо дар донишкада таҳсил мекунанд.

Ҳамчунин гуфта шуд, ки бо мақсади рушди санъати тасвирӣ ва дизайн раёсати донишкада дар давраи фаъолияти худ то инҷониб бо 8 донишгоҳу донишкадаҳои хориҷӣ равобити ҳамкорӣ ба роҳ мондааст.

Мавриди зикр аст, ки дар донишкада таълим дар зинаи бакалавриат (шакли таҳсили рӯзона ва фосилавӣ) ва магистратура (рӯзона) ба роҳ монда шудааст.