Имрӯз дар Москва ҷаласаи Шӯрои намояндагони доимии ИДМ доир мегардад

ДУШАНБЕ, 25.02.2020 /АМИТ «Ховар»/.  25 феврал дар Кумитаи иҷроияи ИДМ дар Минск ҷаласаи Шӯрои намояндагони доимии салоҳиятдори  давлатҳои аъзои Иттиҳод дар назди мақомоти оинномавӣ ва дигар мақомоти Иттиҳод доир мегардад, хабар медиҳад АМИТ «Ховар» бо истинод ба хадамоти матбуоти Кумитаи иҷроияи ИДМ.

Дар ҷаласа раиси Кумитаи иҷроияи ИДМ —  Сергей Лебедев ширкат менамояд.

Дар рӯзномаи маҷлис  шаш масъала  ворид  шудааст. Намояндаҳои доимӣ иҷрои чорабиниҳои  бахшида ба Соли китобро дар Иттиҳоди Давлатҳои Мустақил ҷамъбаст намуда,  пешниҳодҳоро  оид ба лоиҳаи рӯзномаи ҷаласаи  навбатии  Шӯрои сарони давлатҳои ИДМ, ки 29 май дар Тошканд баргузор мешавад, баррасӣ месозанд.

Аъзои Шӯрои  намояндагони доимӣ ҳамчунин пешниҳоди Россияро  дар бораи баргузории ҷаласаи гурӯҳи коршиносон оид ба  таъсиси  Комиссияи ҳуқуқи инсони  ИДМ баррасӣ карда, ташаккул ва иҷрои буҷети ягонаи мақомоти Иттиҳодро  мавриди муҳокима қарор   хоҳанд дод.

Илова ба ин, дар ҷаласа қабули лоиҳаи рӯзномаи маҷлиси муштараки Шӯрои намояндагони доимӣ ва Комиссия оид ба масъалаҳои иқтисодии Шӯрои ваколатдори доимӣ, баррасии омодагӣ ба поягузории  тантанавӣ ва ифтитоҳи гулгашти  Дӯстии  давлатҳои аъзои ИДМ ба муносибати 75 –солагии Ғалаба дар Ҷанги Бузурги Ватанӣ  ба нақша гирифта шудааст.

Дар акс: Сафири Ҷумҳурии Тоҷикистон дар Беларус, намояндаи салоҳиятдори Ҷумҳурии Тоҷикистон  дар мақомоти ваколатдор ва дигар мақомоти ИДМ  Маҳмадшариф Ҳақдод.