«Сомон Эйр» теъдоди хатсайрҳоро аз Душанбе ба Деҳлӣ зиёд намуд

ДУШАНБЕ, 26.02.2020. /АМИТ «Ховар»/. Ширкати ҳавопаймоии «Сомон Эйр» шурӯъ аз имрӯз хатсайри дуюмро дар масири Душанбе-Деҳлӣ-Душанбе ба роҳ монд. Парвозҳо дар самти мазкур ҳафтае ду маротиба- рӯзҳои чоршанбе ва якшанбе тавассути ҳавопаймои Боинг 737 иҷро мегарданд.

«Сомон Эйр» хатсайри аввалини худро ба Деҳлӣ 1 декабри соли 2019 анҷом дод, ки тавасути он аз Душанбе ба Деҳлӣ 107 мусофир парвоз намуданд.

Аз хадамоти матбуоти ширкати ҳавопаймоии «Сомон Эйр» ба АМИТ «Ховар» иттилоъ доданд, ки вақти парвоз аз Душанбе соати 8:30, вақти нишаст дар Деҳлӣ 11:30 бо вақти маҳаллӣ мебошад. Вақти парвоз аз Деҳлӣ – 13:10, вақти нишаст дар Душанбе – 15:20 бо вақти маҳаллӣ таъйин шудааст. Вақти парвоз 2 соату 30 дақиқаро ташкил медиҳад.

Ширкати ҳавопаймоии «Сомон Эйр» парвозҳоро аз Тоҷикистон ба Германия, Аморати Муттаҳидаи Араб, Туркия, Чин, Ҳиндустон, Россия, Қазоқистон ва Ӯзбекистон  муваффақона анҷом медиҳад. Парки ширкати ҳавопаймоӣ аз ҳавопаймоҳои Боинг 737-300, -800 ва -900, инчунин чархболи Airbus H125 иборат мебошад.