ВАО: Эрон пас аз Чин ва Кореяи Ҷанубӣ маркази сеюми паҳншавии коронавирус гардид

ДУШАНБЕ, 25.02.2020 /АМИТ «Ховар»/. Рӯзҳои охир на танҳо аз Чин ва Кореяи Ҷанубӣ, балки аз Эрон низ иттилооти изтиробовар дар бораи ҳолатҳои нави беморӣ ва ҳатто марг аз сирояти коронавируси чинии COVID-19 мерасанд. Бино ба иттилои «Новые Известия», сухан асосан дар бораи одамони бемори  шаҳри муқаддаси шиамазҳабон-Қум, воқеъ дар шимоли мамлакат  меравад. Гуфта мешавад, ки ин вирус тавассути яке аз зиёраткунандагон паҳн гаштааст.

Тибқи иттилои намояндаи Вазорати тандурустии Эрон Каёнуш Ҷаҳонпур, се ҳолати нави сироятёбӣ аз коронавируси COVID-19 дар шаҳрҳои Қум ва Эроқи ин давлат ба қайд гирифта шудааст. Ҳамаи беморон эронӣ ҳастанд, — зикр мекунад агентии “РИА Новости”.

Қаблан хабар расида буд, ки дар шаҳри Қум ду шаҳрванди Эрон аз ин беморӣ фавтиданд, ки ба гуфтаи онҳо, бо чиниҳо ягон робита надоштаанд. Мақомоти Эрон иддао доранд, ки вазъ бо COVID-19 дар Қум таҳти назорат аст ва аз паҳн шудани беморӣ хавотир нашаванд. Ҳамзамон, ширкати давлатии телевизион ва радиои IRIB дар Эрон хабар додааст, ки дар Қум қарор дода шудааст барои омӯзиши вазъи эпидемияи эҳтимолӣ дарсҳоро дар мактабҳо ва донишгоҳҳо қатъ намоянд. То 20 феврал шумораи қурбониёни коронавирус дар музофоти Хубэи Чин ба 2029 нафар расид, 10 337 нафар шифо ёфтанд ва 62 031 нафар  то ҳол бемор мебошанд.  Имрӯз маълум шуд, ки коронавирус боз дар ду шаҳрванди Россия дар киштии  саёҳатӣ бо номи “Diamond Princess” ташхис шудааст, ки дар Япония таҳти карантин қарор дода  шуда, рӯзҳои наздик онҳо ба беморхона бурда мешаванд. Қаблан, дар он ҷо боз як шаҳрванди Россия ҳамчун бемор ба  қайд гирифта шуда буд.

Дар худи Россия ҳоло беморони коронавирус вуҷуд надоранд, аммо Россия сарҳадро барои шаҳрвандони Чин муваққатан бастааст.