Дар Хатлон шумораи соҳибкорон меафзояд

БОХТАР, 13.03.2020 /АМИТ «Ховар»/.  Дар ду моҳи соли равон  дар вилояти Хатлон раванди  зиёд шудани  шумораи соҳибкорон  ба назар мерасад. Дар ин давра аз ҳисоби соҳибкорон 16,4 миллион сомонӣ ба буҷа ворид шудааст. Дар ин бора аз маркази матбуоти мақомоти иҷроияи ҳокимияти давлатии вилояти Хатлон   хабар доданд.

Дар вилоят шумораи соҳибкороне, ки  бо иҷозатнома  ва шаҳодатнома кор мекунанд, 32,6 ҳазорро ташкил дода, дар қиёс бо ҳамин давраи соли гузашта 676 нафар зиёд  мебошад.

Афзудани шумораи соҳибкорон имкон фароҳам  овард, ки аҳолӣ бо кор таъмин шуда, буҷети вилоят ғанитар гардад.

Ба ҷуз ин, бо мақсади бо кор таъмин намудани аҳолӣ дар шаҳрҳо ва ноҳияҳои  вилоят 52 ярмаркаи  ҷои кор баргузор гардид, ки дар онҳо 1244 ҷой барои кор пешниҳод  шуданд.