Президенти Туркманистон тавсия дод, ки дар муассисаҳо ҳазориспанд дуд кунанд

ДУШАНБЕ, 17.03.2020. /АМИТ «Ховар»/. Президенти  Туркманистон Қурбонгулӣ Бердимуҳаммадов 13 март дар ҷаласаи ҳукумати кишвараш ба мавзӯи паҳншавии коронавируси нав  дар саросари ҷаҳон  дахл карда, тавсия дод, ки ҳазориспанд ҳамчун василаи пешгирӣ аз ин вирус истифода шавад. Дар ин бора шабакаи давлатии телевизиони ин кишвар «Алтин Асир» («Золотой век») хабар дод,  менависад хабарнигори АМИТ «Ховар» бо такя ба хабаргузории «РИА Новости».

Бино ба гуфтаи Президенти Туркманистон, ҳазориспанд давои «чандин дард аст». Ба иттилои расонаҳо, мақомоти Туркманистон борҳо ба сокинон тавсия додаанд, ки барои дармон ёфтанд аз бемориҳои гуногун ҳазориспанд истифода кунанд.

Тавре АМИТ «Ховар» қаблан хабар дода буд, тибқти омори СУТ, дар Туркманистон то имрӯз ҳолати сироятёбӣ аз вируси нав ба қайд гирифта нашудааст, вале ҳукумати мамлакат чун сойири кишварҳо  ҷиҳати пешгирии ин вирус тадбирҳо меандешад.  Бино ба хабари Радиои «Озодӣ», дар мамлакат нуқтаҳои карантинӣ ташкил шуда, афроде, ки аз давлатҳои дорои теъдоди зиёди мубталоёни коронавирус меоянд, ба ин нуқтаҳо фиристода мешаванд.

ДАР АКСҲО: баъди ин тавсияи президент дар муассисаҳои давлатӣ ва мактабҳои Туркманистон маъракаи дуд кардани ҳазориспанд шурӯъ шуд. Аксҳо аз ТВ «Алтин Асир».