Дар Бохтар беш аз 800 нафар барои рӯйхат кардани аҳолӣ ҷалб ва омӯзонида мешаванд

БОХТАР, 20.04.2020 /АМИТ «Ховар»/. Барои рӯйхат кардани аҳолӣ  дар шаҳри Бохтар беш аз 800 нафар ҷалб ва омӯзонида мешаванд. Ҳамчунин раисони шӯрои маҳаллаҳо, кормандони мақомоти худидораи маҳаллӣ низ ҷалб карда мегарданд, зеро онҳо бо аҳолӣ суҳбат намуда, таблиғот мебаранд.

Дар ин бора имрӯз, 20 апрел  дар оғози семинари дурӯза, ки дар шаҳри  Бохтари вилояти Хатлон  дар мавзӯи «Барӯйхатгирии аҳолӣ ва фонди Ҷумҳурии Тоҷикистон – 2020» баргузор гардид,  иттилоъ дода шуд.

Тавре  мухбири минтақавии АМИТ «Ховар» хабар медиҳад, семинари  мазкур бо дастгирии Бунёди  СММ (UNFPA) дар самти аҳолӣ дар доираи лоиҳаи нави «Тақвияти омори демографӣ дар Тоҷикистон», ки аз ҷониби Федератсияи Россия маблағгузорӣ мешавад,  доир мегардад.

«Дар семнар муовини директори Агентии омори назди Президенти Ҷумҳурии Тоҷикистон Қиёмиддин Давлатзода ва сардори идораи омори вилояти Хатлон Қурбон Ҳакимзода ширкат намуданд»,-афзуд манбаъ.

Ба иштирокчиён иттилоъ дода шуд, ки барӯйхатгирии аҳолӣ ва фонди манзил рӯйдоди муҳими давлатӣ мебошад. Он барои нишондиҳандаҳои муайяни иҷтимоӣ, иқтисодӣ ва демографӣ маълумоти аниқ ва  пурраи аҳолиро фароҳам меорад ва омори воқеии демографӣ таҳия менамояд.

Натиҷаҳое, ки дар ҷараёни рӯйхат кардани аҳолӣ  ба даст меоянд, ба таҳияи сиёсати иҷтимоию иқтисодӣ ва демографӣ, пешбинӣ ва барномаҳо оид ба рушди иҷтимоию иқтисодӣ, ҳамчунин ҳалли самарабахши  вазифаҳо дар соҳаҳои гуногун мусоидат мекунанд.

15 апрел чунин семинари дурӯза дар шаҳри Кӯлоб баргузор гардид.