ДАРАХТ БИНШОН! Дар шаҳри Хоруғ 1500 бех дарахт мешинонанд

ДУШАНБЕ, 24.04.2020. /АМИТ «Ховар»/. Дар мавсими имсола дар ҳудуди шаҳри Хоруғ 1500 бех дарахтон шинонида мешаванд, ки аз он 700 бех  дарахтони ороишӣ, 600 бех дарахтони сояафкан ва 200 бех дарахтони мевадиҳанда мебошанд.  То имрӯз дар ҳудуди шаҳр 600 бех дарахтони ороишӣ, 200 бех дарахтони мевадиҳанда ва 700 бех гули садбарг шинонида шудаанд. Дар ин бора аз мақомоти иҷроияи ҳокимияти давлатии шаҳри Хоруғ ба АМИТ «Ховар» хабар доданд.

Дар гармхонаҳои шаҳри Хоруғ, ки 240 метри мураббаъро ташкил медиҳанд,  навъҳои гуногуни гул кӯчат шудаанд. Дар  маҳаллаи  Тирчид дар масоҳати  82м²  гармхонаи замонавӣ сохта  шудааст, ки дар он гулҳои гуногун парвариш ёфта истодаанд.

Аҳолии шаҳри Хоруғ барои обёрӣ кардани заминҳои наздиҳавлигӣ аз каналҳои ба номи «Темур», «Додихудоев» ва «Шош  Хоруғи Поён»-и шаҳри Хоруғ истифода мебарад. Шурӯъ аз аввали моҳи марти имсол кормандони мақомоти шаҳрӣ ва вилоятӣ ҳар рӯзи шанбе ҳашарҳо гузаронида истодаанд. Барои таъмири канали «Темур» дар масофаи 200 метр дар маҳаллаи Бархоруғ ва 80 метр дар маҳаллаи Хичордев масолеҳи сохтмонӣ таъмин карда шуда, кор дар каналҳои шаҳри Хоруғ давом дорад.

Ҳамчунин барои бо оби нӯшокӣ таъмин намудани истеъмолкунандагони шаҳр аз  71,2 км   хатҳои обгузар ва чор  манбаи обтаъминкунӣ истифода бурда мешавад.
Дар шаҳр 4 обанбор мавҷуд буда, ҳар яки онҳо нигоҳдории 2000м³ обро доро мебошанд, ки дар маҷмӯъ 8000 м³-ро ташкил медиҳад. Истеҳсоли оби нӯшокӣ аз ҳисоби ҳамаи сарчашмаҳо ва манбаъҳои обтаъминкунии шаҳр дар як шабонарӯз 12 537 м³ -ро ташкил медиҳад.