Фархор: «Амонатбонк» дар мавзӯи «Такмили маърифати молиявии аҳолӣ» машваратӣ омӯзишӣ доир намуд

ДУШАНБЕ, 09.04.2020. /АМИТ «Ховар»/. Бонки давлатии амонатгузории Ҷумҳурии Тоҷикистон «Амонатбонк» дар доираи моҳи саводнокии молиявӣ  дар Тоҷикистон ва Ҳафтаи байналмилалии  молиявӣ «Global Money Week-2020» дар филиали №61-и «Амонатбонк», воқеъ дар ноҳияи Фархор дар мавзӯи «Такмили маърифати молиявии аҳолӣ» машваратӣ омӯзишӣ доир намуд.

Аз «Амонатбонк»  ба АМИТ «Ховар» иттилоъ доданд, ки дар машварати омӯзишӣ муовини раиси Раёсати «Амонатбонк» Шаҳло Сайфзода ба иштирокдорони  он доир ба имкониятҳои муосири  бонки мардумии

Тоҷикистон «Амонатбонк»  иттилоъ дода,  гуфт, ки ҳадафи баргузории Ҳафтаи байналмилалии молиявӣ «Global Money Week-2020» баланд бардоштани саводнокии молиявии аҳолӣ, хусусан наврасону ҷавонон ва дар ниҳоди онҳо сайқал додани малакаи соҳибкорӣ мебошад.

Дар ҷараёни  машварати омӯзишӣ  ба иштирокдорон дар бораи нақши пул, қоидаҳои идоракунии пул, банақшагирии молиявӣ ва буҷети оила, таваррум ва таъсири он ба имкониятҳои иқтисодии давлат ва субектҳои хоҷагидор, нақши бонкҳо дар рушди иқтисодиёт  маълумоти мукаммал дода шуд.

Тибқи иттилои сарчашма, чорабиниҳо  дар доираи «Global Money Week-2020»  дар дигар  филиалҳои «Амонатбонк» ва марказҳои хизматрасониҳои бонк  идома дошта, моҳи апрел бо мақсади баланд бардоштани  саводнокии молиявии хонандагону донишҷӯён мутахассисони «Амонатбонк» омӯзишҳо мегузаронанд.

Ҳамзамон иштирокдорони фаъоли омӯзишҳо бо туҳфаҳои хотиравии бонки мардумии Тоҷикистон — «Амонатбонк» сарфароз гардонида мешаванд.