Ҷаласаи навбатии Кумитаи ҷумҳуриявии ҳамоҳангсозии мусоидат ба шуғли аҳолӣ дар Тоҷикистон доир гардид

ДУШАНБЕ, 27.06.2020. /АМИТ «Ховар»/. 26 июн дар Вазорати меҳнат, муҳоҷират ва шуғли аҳолии Ҷумҳурии Тоҷикистон ҷаласаи навбатии Кумитаи ҷумҳуриявии ҳамоҳангсозии мусоидат ба шуғли аҳолӣ баргузор гардид. Дар ин бора АМИТ «Ховар» бо истинод ба Вазорати меҳнат, муҳоҷират ва шуғли аҳолии Ҷумҳурии Тоҷикистон хабар медиҳад.

Бино ба иттилоӣ манбаъ, дар ҷаласа Вазири меҳнат, муҳоҷират ва шуғли аҳолии Ҷумҳурии Тоҷикистон, муовини раиси Кумитаи ҷумҳуриявии ҳамоҳангсозии мусоидат ба шуғли аҳолӣ Гулрӯ Ҷабборзода, муовинони вазирони молия, маориф ва илм, кумитаҳои кор бо занон ва оила ва ҷавонон ва варзиш иштирок намуданд.

Дар ҷаласа масъалаҳо «Дар бораи натиҷаҳои фаъолияти кумитаи ҳамоҳангсозии мусоидат ба шуғли аҳолӣ дар ВМКБ» ва «Оид ба иҷрои қарори Ҳукумати Ҷумҳурии Тоҷикистон аз 31 августи соли 2018, «Дар бораи тадбирҳои татбиқи Фармони Президенти Ҷумҳурии Тоҷикистон аз 14 августи соли 2018, дар шаҳру ноҳияҳои Роғун, Ҳисор, Файзобод, Нуробод ва Лахш» баррасӣ шуданд.

Дар фарҷом ҷаласа аз рўи масъалаҳои муҳокимашуда қарорҳои дахлдор қабул гардиданд.

Ёдовар мешавем, ки бо мақсади ба роҳ мондани муколамаи иҷтимоӣ барои муайян ва амалӣ гардонидани сиёсати шуғли аҳолии Ҷумҳурии Тоҷикистон дар доираи ҳамкории сетарафаи байни Ҳукумати Ҷумҳурии Тоҷикистон, Федератсияи иттифоқҳои касбаи мустақили Тоҷикистон ва Иттиҳодияи корфармоён ҷиҳати таҳияи қарорҳо, пешниҳодҳо ва тавсияҳои мувофиқакардашуда Кумитаи ҷумҳуриявии ҳамоҳангсозии мусоидат ба шуғли аҳолӣ таъсис дода шудааст, ки фаъолияти ташкилоту муассисаҳоро новобаста ба шакли моликияташон дар самти бокортаъминкунии аҳолии бешуғл ҳамоҳанг месозад.