Дар Турсунзода 83 синфхонаи иловагӣ бунёд мегардад

ТУРСУНЗОДА, 28.07.2020. /АМИТ «Ховар»/. То ҷашни 30-солагии Истиқлолияти давлатии Ҷумҳурии Тоҷикистон дар шаҳри Турсунзода сохтмони 367 иншооти дорои аҳамияти ҷамъиятиву ҷумҳуриявӣ ба нақша гирифта шудааст, ки то имрӯз 179 иншоот, аз ҷумла  сардхонаҳо, майдонҳои варзишӣ, марказҳои саломатӣ, бунгоҳҳои тиббӣ, коргоҳҳои дӯзандагӣ, кошонаҳои ҳусн ва ҳаммомҳои замонавӣ  мавриди баҳрабардорӣ қарор гирифтаанд.  Ин матлабро зимни нишасти матбуотӣ иҷрокунандаи раиси шаҳри Турсунзода  Парвиз Акрамзода иброз намуд.

Инчунин бо мақсади  фароҳам овардани шароити таҳсил ва ҳалли масъалаҳои  норасоии  ҷойи нишаст бунёди 83 синфхонаи иловагӣ, 2 толори варзишӣ ва Хонаи кӯдакони шаҳр идома дорад.

Ба маълумоти номбурда, дар шашмоҳаи якуми соли 2020 дар ҳудуди шаҳри Турсунзода ҳаҷми маҳсулоти саноатӣ ба 419,1 миллион  баробар шуд, ки нисбат ба ҳамин давраи соли гузашта корхонаҳои саноатии шаҳр  ба маблағи 7,9  миллион сомонӣ зиёдтар  маҳсулот истеҳсол намудаанд.