Кумитаи давлатии заминсозӣ ва геодезӣ нисбат ба 6611 вайронкунандаи қонунгузорӣ даъвои судӣ пешниҳод намуд

ДУШАНБЕ, 17.07.2020 /АМИТ «Ховар»/. Давоми шаш моҳи соли 2020 Кумитаи давлатии заминсозӣ ва геодезӣ 6697 ҳолати вайрон намудани муқаррароти қонунгузорӣ дар бораи заминро ошкор ва ҷиҳати рафъи онҳо нисбат ба 6611 тан даъвоҳои судӣ пешниҳод намудааст. Дар ин бора имрӯз зимни нишасти матбуотӣ раиси Кумитаи давлатии идораи замин ва геодезии Ҷумҳурии Тоҷикистон Ориф Хоҷазода хабар дод.

Дар нишаст ҳамчунин иттилоъ дода шуд, ки бар асоси 6156 даъвои судӣ парвандаҳои ҷиноятӣ оғоз ва дар ҳаҷми 2 940 763 сомонӣ ҷарима баста шуд, ки аз он маблағи 2 348.439 сомонӣ (80%) ба суратҳисоби махсуси давлат интиқол ёфтааст.

Дар нишаст таъкид гардид, ки мутобиқи қарорҳои Ҳукумати Ҷумҳурии Тоҷикистон дар тӯли 10 сол, аз соли 2009 то 2019 мақомоти иҷроияи маҳаллии ҳокимияти давлатии шаҳру ноҳияҳо барои таъмини эҳтиёҷоти аҳолии ба қитъаҳои замини наздиҳавлигӣ 30492,47 га замин ҷудо намудаанд.