Осоишгоҳҳои Варзоб дар реҷаи маъмулӣ фаъолият мекунанд

ДУШАНБЕ, 21.07.2020. /АМИТ «Ховар»/. То имрӯз дар осоишгоҳҳои ноҳия беш аз 2700 нафар шаҳрвандони мамлакат, аз ҷумла 86 шаҳрванди хориҷӣ давраи карантинро сипарӣ намудаанд. Дар тамоми давраи карантини шаҳрвандони хориҷӣ ва ватанӣ дар осоишгоҳҳои минтақаи Варзоб касе аз сокинони маҳаллӣ изҳори нигаронӣ ё норозигӣ накардааст. Дар ин бора 20 июл раиси Мақомоти иҷроияи ҳокимияти давлатии ноҳияи Варзоб Маҳмадулло Шерализода зимни нишасти матбуотӣ эълом намуд.

«Хатари пандемияи COVID-19 ба тамоми ҷаҳон таҳдид мекунад. Ман шодам, ки сокинони минтақаи Варзоб инро дарк кардаанд. Аз рӯзҳои аввал онҳо ба шаҳрвандоне, ки муваққатан дар карантин қарор доштанд, кумак мерасониданд»,- шарҳ дод Маҳмадулло Шерализода.

Раиси ноҳия инчунин иброз дошт, ки баъзе одамон бар ин бовар буданд, ки пас аз хатми чораҳои карантинӣ эҳтимол дар дили касе хоҳиши истироҳат дар «Хоҷа оби гарм» пайдо нашавад. Вале осоишгоҳ зиёда аз як моҳ боз дар реҷаи маъмулӣ фаъолият ва тақрибан 400 нафар шаҳрвандон дар ин ҷо саломатии худро барқарор мекунанд.