Дар Суғд дар беш аз 19 ҳазор гектар кишти такрорӣ гузаронида шудааст

СУҒД, 12.08.2020 /АМИТ «Ховар»/. Имрӯзҳо дар хоҷагиҳои кишоварзии вилояти Суғд ҷараёни кишти такрорӣ  босуръат идома дорад. То 10 август  деҳқонони вилоят дар 19 511 гектар кишт гузаронидаанд, ки он 94,7 фоизи нақшаи дурнаморо ташкил медиҳад.

Тавре аз бахши кишоварзии Мақомоти иҷроияи ҳокимияти давлатии вилоят ба хабарнигори АМИТ «Ховар» иттилоъ доданд, тибқи нақша имсол дар вилоят бояд дар 20 600 гектар кишти такрорӣ гузаронида шавад.

Дар айни замон аз 14 шаҳру ноҳияи кишоварзии вилоят дар 12 минтақа кишти такрорӣ анҷом ёфтааст. Кишоварзони 8 ноҳия бо мақсади истифодаи самараноки замин нақшаи кишти такрориро сари вақт иҷро намуданд.

Аз ҷумла, самти хуби кор дар шаҳру ноҳияҳои Деваштич (134,4%), Ҷ.Расулов (117,4%) ва Конибодом (107,8%), ки нақшаро барзиёд иҷро намудаанд, бештар ба назар мерасад.

Маъракаи кишти такрорӣ дар се минтақаи вилоят хеле суст ҷараён дошта, то санаи зикргардида кишоварзони шаҳри Панҷакент ҳамагӣ 81,3%, ноҳияи Зафаробод 63,0% ва шаҳри Истаравшан 59,0% — и нақшаро иҷро кардаанду халос.

Кишоварзони ин минтақаҳоро зарур аст, ки аз ҳар лаҳзаи мусоид самаранок истифода карда, кишти такрории зироатро сари вақт анҷом диҳанд.