Дар Кӯлоб масъалаи ободонии шаҳр баррасӣ шуд

БОХТАР, 07.09.2020 /АМИТ «Ховар»/. Ҷаласа оид ба ободонии шаҳри Кӯлоб  5 сентябр таҳти раёсати Ёрдамчии Президенти Ҷумҳурии Тоҷикистон оид ба рушди иҷтимоӣ ва робита бо ҷомеа Абдуҷаббор Раҳмонзода, муовини раиси вилояти Хатлон Раҷабалӣ Раҷабов ва иҷрокунандаи вазифаи раиси Кӯлоб Абдуқодир Вализод баргузор гардид. Дар ин бора Мақомоти иҷроияи ҳокимияти давлатии шаҳри Кӯлоб хабар медиҳад.

Дар ҷаласа масоили вобаста ба таъмири роҳҳо, таъминоти аҳолӣ бо оби нӯшиданӣ ва назорати истифодаи он, сабзазоркунии кӯчаҳои шаҳру деҳот ва чароғонкунии ҷодаҳо баррасӣ шуданд.

Ба масъулини сохторҳои марбута  супориш дода шуд, ки дар ҳамкорӣ  фаъолият  намуда, корҳои маҷмӯии  сохтмониро дар иншооти ба нақша гирифташуда анҷом диҳанд. Ба гурӯҳҳои корӣ тавсия дода шуд, ки ба тозагии шаҳр ва тартибот диққати махсус диҳанд, дар байни сокинон оид ба риояи тартибот корҳои тавзеҳотӣ баранд.

Дар хотима зикр карда шуд, ки то 30-юмин солгарди Истиқлолияти давлатии Ҷумҳурии Тоҷикистон симои шаҳри Кӯлоб ва деҳаҳои атрофи он бояд ба куллӣ тағйир дода шавад, коргоҳҳо ва корхонаҳои саноатӣ бунёд ва дар ин замина сатҳи зиндагии сокинон  баланд бардошта шавад.