Дар Кӯлоб Намоиши нигоҳдории растаниҳои худрӯй доир гардид

Сентябрь 5, 2020 08:46

 КӮЛОБ, 05.09.2020 /АМИТ «Ховар»/. Дар Боғи ботаникии шаҳри Кӯлоби вилояти Хатлон бо иштироки олимону муҳаққиқони Академияи миллии илмҳои Тоҷикистон ҳамоиши бошукӯҳ таҳти унвони «Намоиши нигоҳдории растаниҳои худрӯй дар минтақаи Кӯлоб» баргузор гардид.

Тавре мухбири минтақавии АМИТ «Ховар» иттилоъ дод, дар ин ҷамъомад ба ҳозирин оид ба растаниҳои нодири маҳвшаванда, ки дар минтақаҳои мушкилгузари кӯҳии вилояти Хатлон мерӯянд, ба воситаи аксҳо маълумоти зарурӣ пешниҳод карда шуд.

Боғи ботаникии шаҳри Кӯлоб ҳанӯз соли 1985-и қарни гузашта таъсис дода шуда, инак беш аз 35 сол мешавад, ки дар минтақаи Кӯлоб ҳамчун маркази илмии вилояти Хатлон фаъолият мекунад. Яке аз самтҳои асосии фаъолияти илмию тадқиқотии ин маркази илмӣ парвариш ва нигоҳубини растаниҳое мебошад, ки онҳо маҳз дар минтақаи субтропикии Кӯлоб сабзиш мекунанд.

Дар ҳамоиш аз ҷониби муҳаққиқон иттилоъ дода шуд, ки беш аз 200 намуди растаниҳои эндемикии минтақаҳои кӯҳии вилояти Хатлон маҳз дар минтақаҳои кӯҳии Кӯлоб нашъу намо доранд. Қисмати зиёди ин растаниҳо дар минтақаҳои мушкилгузари ноҳияҳои Ховалинг, Мӯъминобод, Балҷувон ва Шамсиддини Шоҳин мерӯянд ва давоми 5 соли охир аз ҷониби муҳаққиқону олимони боғи Ботаникии шаҳри Кӯлоб дар бораи онҳо маълумоти зарурӣ ҷамъоварӣ карда шуданд.

Зимнан ба корҳои анҷомдодашудаи масъулони боғи ботаникӣ аз ҷониби олимони шуъбаи илмҳои биология ва тибби Академияи миллии илмҳои Тоҷикистон баҳои баланд дода шуда, ҷиҳати тақвият додани фаъолияти боғи ботаникӣ маслиҳатҳои муфид дода шуд.

Тавре ноиби Президенти Академияи миллии илмҳои Тоҷикистон Абдусаттор Саидов иттилоъ дод, Боғи ботаникии шаҳри Кӯлоб  маркази илмии вилояти Хатлон ба ҳисоб рафта, дар ин мавзеъ ба ғайр аз чорабиниҳои илмӣ-тадқиқотӣ ҳамчунин барномаҳои фарҳангию фароғатӣ бо иштироки муҳассилини муассисаҳои таҳсилоти миёна ва донишҷӯёну омӯзгорон пайваста баргузор мешаванд.

Ба гуфти масъулини боғи мазкур, намоиши аксҳои растаниҳои худрӯй ва воситаҳои нигоҳубини он рӯзҳои баъдӣ низ идома меёбад. Дар фарҷоми сессияи сайёри шуъбаи илмҳои биология ва тибби Академияи миллии илмҳои Тоҷикистон, ки дар Боғи ботаникии шаҳри Кӯлоб баргузор гардид, аз ҷониби олимон ва муҳаққиқони соҳа ба кори анҷомдодаи масъулини боғи ботаникӣ баҳои баланд дода шуд.

Таъкид гардид, ки маълумоти ҷамъовардашуда на танҳо барои донишҷӯёни факултаи биология, балки барои дигар донишҷӯён низ намоиш дода шавад, то онҳо нисбат ба растаниҳои нодиру маҳвшаванда маълумоти зарурӣ дарёфт кунанд.

Сентябрь 5, 2020 08:46

Хабарҳои дигари ин бахш

ОБУ ҲАВО: Имрӯз дар Тоҷикистон ҳаво тағйирёбанда ва камабри бебориш мешавад
Маркази барномаҳои байналмилалӣ: ҳуҷҷатсупорӣ барои бурсияҳои таҳсилии Қирғизистон оғоз гардид
ОБУ ҲАВО: Имрӯз дар Тоҷикистон ҳаво 18+23 дараҷа гарм мешавад
ОБУ ҲАВО: Имрӯз дар Тоҷикистон ҳаво тағйирёбанда ва камабр мешавад
COVID-19. Дар Тоҷикистон шумораи гирифторони коронавируси нав ба 10222 нафар расид
Таҷлили Рӯзи кормандони мақомоти адлия дар Кӯлоб: волидайн вазифадоранд барои фарзандонашон номи зебо гузоранд
ОБУ ҲАВО: Имрӯз дар Тоҷикистон ҳавои камабр ва тағйирёбанда дар назар аст
Бо волонтёрони участкаҳои ҳавзаи №3-и ноҳияи Шоҳмансур мулоқот доир гардид
ИМРӮЗ ВА ПАГОҲ ДАР ТОҶИКИСТОН ҲАВО ЯКБОРА САРД МЕШАВАД. Дар ин бора ба АМИТ «Ховар» аз Агентии обуҳавошиносии мамлакат хабар доданд
ОБ ЗАХИРА НАМОЕД! Дар баъзе шаҳраку маҳаллаҳои Душанбе бинобар корҳои таъмирию профилактикӣ интиқоли оби нӯшокӣ муваққатан қатъ мегардад
«Асолати давлатдорӣ», «Интихобот ҳокимияти халқро дар идоракунии давлат таъмин месозад»,- шарҳи матбуоти даврии Тоҷикистон
Паҳлавонони тоҷик ба мусобиқаи Тоскулоҳи бузурги Венгрия омодагӣ мебинанд