Форуми соҳибкорони корхонаҳои нассоҷӣ ва дӯзандагии Тоҷикистон доир гардид

ДУШАНБЕ, 28.09.2020 /АМИТ «Ховар»/. Роҳҳои рушди соҳаи нассоҷӣ ва дӯзандагии мамлакат дар Форуми дуюми миллии соҳибкорони корхонаҳои нассоҷӣ ва дӯзандагии аъзои Иттифоқи рушди бахши хусусии Тоҷикистон (ИРБаХТ), ки дар мавзӯи «Коркарди нахи пахтаи истеҳсоли ватанӣ то маҳсулоти рақобатпазири ниҳоии содиротӣ ва воридоти ивазкунанда, рушди соҳаҳои ресандагӣ, бофандагӣ, рангу пардоздиҳӣ, кешбофӣ ва дӯзандагӣ – самти афзалиятноки саноатикунонии босуръати иқтисодиёти Тоҷикистон» дар  Душанбе доир гардид, баррасӣ шуд. Форум бо ибтикори Иттифоқи рушди бахши хусусии Тоҷикистон дар ҳамкорӣ бо Вазорати саноат ва технологияҳои нави ҷумҳурӣ гузаронида шуд.

Дар форум соҳибмулкон, роҳбарон, мутахассисони корхонаҳои нассоҷӣ ва дӯзандагии аъзои Иттифоқ аз шаҳру ноҳияҳои ҷумҳурӣ, намояндагони вазорату идораҳои марбутаи давлатӣ, шарикони байналмилалии рушд мушкилоти ҷойдошта ва роҳҳои рушди соҳаи нассоҷӣ ва дӯзандагиро дар Тоҷикистон баррасӣ намуданд. Ҳамзамон доир ба вазъи кунунӣ ва амалишавии барномаҳои давлатӣ дар самти коркарди ниҳоии нахи пахта, рушди соҳаҳои ресандагӣ, бофандагӣ, кешбофӣ ва дӯзандагӣ, вазъи ҳозираи корхонаҳо, истифодаи тавоноиҳои мавҷудаи истеҳсолотӣ, сифат ва арзиши маҳсулот ва таъсири он ба рақобатпазирии корхонаҳо дар бозорҳои дохилӣ ва байналмилалӣ, талаботи бозори кор ва сифати омодасозии кадрҳои баландихтисос барои соҳа табодули назар сурат гирифт.

Раиси Шӯрои ИРБаХТ Файзалӣ Раҷабов гуфт, ки «сарфи  назар аз мушкилоти пешомада, аксари корхонаҳои соҳа тавонистанд сари вақт ба талабот ва воқеиятҳои нави бозор мутобиқ гарданд ва истеҳсоли ниқобу либоси муҳофизатии тиббӣ ба роҳ монданд. Корхонаҳо дар ҳадди зарурӣ бозори мамлакатро таъмин карданд ва бо ҳамин роҳ ба ҷомеа ва давлат кумак расониданд».

Роҳбари дафтари Маркази тиҷорати байналмилалӣ дар Тоҷикистон Саидмӯъмин Камолов мегӯяд, ки «бо сабаби баста шудани сарҳадҳо дар саросари минтақа корхонаҳо ба мушкили камбуди таҷҳизот ва қисмҳои эҳтиётӣ мувоҷеҳ гардиданд. Барои  сари вақт фиристодани маҳсулот дар марзҳо мушкил пеш омад, ҳаҷми фурӯш ва фармоишҳо кам шуд. Дар натиҷа баъзе корхонаҳо маҷбур шуданд, ки кормандонашонро ихтисор кунанд ва баъзеи дигар барои муддате аз кор монданд. Вазъи пешомада нишон дод, ки ворид кардани фанновариҳои навини интернетӣ ба соҳа то чӣ андоза аҳамияти аввалиндараҷа дорад».

Зикр шуд, ки танҳо дар сурати фароҳам овардани фазои мусоиди соҳибкорӣ, баланд бардоштани дараҷаи дониши ҳуқуқӣ, иқтисодӣ, касбии соҳибкорон, гирифтани монеаҳои рушди савдо, омода  намудани мутахассисони муҳандисӣ ва коргарони ихтисосҳои асосии босалоҳият, самаранок истифода бурдани  иқтидорҳои истеҳсолии мавҷуда, таъмини рақобатнокии маҳсулоти истеҳсолӣ дар бозори дохилӣ ва хориҷӣ рушди соҳаи нассоҷӣ ва дӯзандагии мамлакат таъмин шуда, он барои ноил шудан ба ҳадафи таъмин намудани коркарди ниҳоии нахи пахтаи истеҳсоли ватанӣ то маҳсулоти рақобатпазири содиротӣ ва воридотивазкунанда мусоидат менамояд.