Лоиҳаи «Нақшаи чорабиниҳои амалисозии Консепсияи идоракунии рушди маҳал барои давраи то соли 2030» таҳия мегардад

ДУШАНБЕ, 15.09.2020 /АМИТ «Ховар»/. Кумитаи рушди маҳали  назди Президенти Ҷумҳурии Тоҷикистон вазифадор гардидааст, ки дар якҷоягӣ бо вазорату идораҳои дахлдор лоиҳаи «Нақшаи чорабиниҳои амалисозии Консепсияи идоракунии рушди маҳал дар Ҷумҳурии Тоҷикистон барои давраи то соли 2030»-ро таҳия карда, то охири соли 2020 ба Ҳукумати Ҷумҳурии Тоҷикистон пешниҳод намояд.

Ин нуктаро Раиси Кумитаи рушди маҳал Қосим Роҳбар имрӯз зимни   ҷаласаи Гурӯҳи кории байниидоравӣ доир ба таҳияи лоиҳаи  «Нақшаи чорабиниҳо оид ба татбиқи Консепсияи идоракунии рушди маҳал барои  давраи  то соли 2030», ки дар Кумитаи мазкур баргузор гардид, иброз дошт.

Дар ҷаласа кормандони Кумитаи рушди маҳал, намояндагони Дастгоҳи иҷроияи Президенти Ҷумҳурии Тоҷикистон, вазорату идораҳои дахлдор ва мақомоти иҷроияи маҳаллии ҳокимияти давлатии шаҳру ноҳияҳо иштирок доштанд.

Дар ҷараёни ҷаласа аз ҷониби иштирокдорон «Консепсияи идоракунии рушди маҳал дар Ҷумҳурии Тоҷикистон барои давраи то соли 2030» мавриди баррасӣ ва муҳокима қарор дода шуд.