Суғд: кишоварзони вилоят имсол беш аз 16 ҳазор тонна мева содир намуданд

ДУШАНБЕ, 27.09.2020. /АМИТ «Ховар»/.  Кишоварзони вилояти Суғд давоми ҳашт моҳи имсол ба бозорҳои мамлакатҳои хориҷӣ ба маблағи 5807 доллар 16 315 тонна меваҷот (то 1 сентябри соли 2019 — 13 818 тонна), аз ҷумла, 4423 тонна меваи тар, 161 тонна ангур ва инчунин ба маблағи  5365 ҳазор доллар сабзавот дар ҳаҷми 69 167 тонна (то 1 сентябри соли 2019 – 52884 тонна), аз он 68845 тонна пиёз содирот намудаанд.        

Тавре аз Сарраёсати идораи кишоварзии вилоят ба хабарнигори АМИТ «Ховар» дар вилояти Суғд иттилоъ доданд, давоми ҳашт моҳи соли равон аз вилоят ба хориҷи мамлакат 402 тонна консерваҳо (нисбат ба ин давраи соли гузашта  261 тонна зиёд) ва ҳамзамон 16 903 тонна нахи пахта, 45 012 тонна чарми хом ва 7 тонна тамоку содирот гардидааст.

Зикр гардид, ки маблағи умумии маҳсулоти содиротӣ 34 ҳазору 418 доллари ИМА-ро ташкил дода, ин нишондиҳанда нисбат ба ҳамин давраи соли гузашта қариб ду ҳазор доллар зиёд мебошад.