Пешвои миллат Эмомалӣ Раҳмон хати нави технологӣ оид ба истеҳсоли 10 намуд кулчақанд дар ҶДММ «Маҳмудов Ғ»-ро дар шаҳри Хуҷанд ба истифода доданд

Октябрь 15, 2020 12:33

ДУШАНБЕ, 15.10.2020 /АМИТ «Ховар»/. 15 октябр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар минтақаи саноатии шимолу шарқии шаҳри Хуҷанд хати нави технологии истеҳсоли 10 намуд кулчақанд дар Ҷамъияти дорои масъулияти маҳдуди «Маҳмудов Ғ»-ро ба истифода доданд.

Коргоҳи истеҳсолӣ дар доираи нақшаи чорабиниҳо ба истиқболи ҷашни 30-солагии Истиқлоли давлатӣ, дар заминаи татбиқи ҳадафи чоруми миллӣ — саноатикунонии босуръати мамлакат дар шаҳри Хуҷанд бунёд гардида, бо номи “Азизи ман” 10 номгуи кулчақанди дорои сифати баландро истеҳсол менамояд.

Хати муосири технологӣ аз Федератсияи Россия ворид шуда, васлу насб гардиааст, ки бо фаъол шудани он 20 нафар занону бонувони маҳаллӣ бо ҷойи кори доимӣ ва маоши хуб таъмин гаштанд.

Арзиши хатти истеҳсолӣ 1 миллиону 150 ҳазор сомонӣ буда, иқтидори истеҳсолӣ дар як шабонарӯз 2 тонна кулчақанд мебошад. Асосан барои омода кардани кулчақанд орд, равған ва шакар истифода мегардад, ки дар бозори истеъмоли ин навъи маҳсулот талабгорони зиёд дорад.

Дар Ҷамъияти дорои масъулияти маҳдуди “Маҳмудов Ғ” 60 нафар коргар фаъолият дошта, беш аз 50 намуд маҳсулоти ивазкунандаи воридот, аз ҷумла кулчақанди “Президент”, ҳасибҳои дуд ва буғкардашуда, ҳасибчаҳо, майонез ва дигар намуди маҳсулоти истеъмолӣ истеҳсол шуда, ба бозорҳо бароварда мешавад.

Тамоми номгӯи маҳсулоти ғизоӣ дар  озмоишгоҳҳо аз ташхис гузашта, дорои сертификати мутобиқат мебошад.

Ҷамъияти мазкур соли 2004 таъсис ёфта, дар масоҳати 1,5 гектар ҷойгир аст.

Корхонаи истеҳсолӣ тӯли фаъолияти босамари худ, маҳсулоти зиёд истеҳсол намуда, дар таъмини бозори истеъмолии мамлакат саҳми назаррас дорад.

Масъулони ширкат азм доранд, ки бо тавлиди маҳсулоти босифат онро ба хориҷ содирот намоянд.

Пас аз ифтитоҳи хати муосири технологӣ ва шиносоӣ бо фаъолияти коргоҳ Президенти Ҷумҳурии Тоҷикистон муҳтарам Эмомалӣ Раҳмон аз намоиши маҳсулоти истеҳсолнамудаи Ҷамъияти дорои масъулияти маҳдуди “Маҳмудов Ғ”, ки дар саҳни корхона ташкил карда шуд, дидан карданд.

Дар намоиш  номгӯи зиёди маҳсулоти корхона муаррифӣ карда шуд. Зимни шиносоӣ Сарвари давлат ба сифати маводи ғизоӣ диққати ҷиддӣ зоҳир намуда, масъулонро барои тавлиди босифати маҳсулоти мутобиқ ба меъёрҳои байналмилалӣ ҳидоят карданд.

Масъулони ширкат нақша доранд, ки фаъолияти корхонаро васеъ ва ҷоннок намуда, бо истеҳсоли маҳсулоти баландсифати ватанӣ ва таъсиси ҷойҳои нави корӣ дар рушди бештари саноати хуроквории мамлакат ҳиссагузор бошанд.

Ифтитоҳи хати нави технологӣ оид ба истеҳсоли 10 намуд кулчақанд дар ҶДММ “Маҳмудов Ғ” дар шаҳри Хуҷанд 15.10.2020

Октябрь 15, 2020 12:33

Хабарҳои дигари ин бахш

ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Бахшида ба 30-солагии Истиқлоли давлатӣ дар Панҷакент 340 иншоот мавриди истифода қарор гирифт
ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Дар Хуҷанд сохтмони тарабхонаи «Форел» бомаром идома дорад
Барқияи изҳори тасаллии Президенти Ҷумҳурии Тоҷикистон Эмомалӣ Раҳмон ба Президенти Ҷумҳурии Франсия Эммануэл Жан-Мишел Фредерик Макрон
Суханронии Президенти Ҷумҳурии Тоҷикистон Эмомалӣ Раҳмон дар ифтитоҳи ҷаласаи Шӯрои амнияти дастаҷамъии СААД
Президенти Ҷумҳурии Тоҷикистон Эмомалӣ Раҳмон дар ҷаласаи Шӯрои амнияти дастаҷамъии Созмони Аҳдномаи амнияти дастаҷамъӣ иштирок намуданд
ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Соҳибкор Фаррух Амонов дар деҳаи Деҳҳавзи Кӯҳистони Мастчоҳ бинои нави муассисаи таълимӣ бунёд намуд
ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Соҳибкорони ноҳияи Фархор дар бунёди муассисаҳои таълимӣ саҳм мегузоранд
Табибони ноҳияи Тоҷикобод соҳиби бинои Маркази саломатӣ гардиданд
Маҷлиси Ҳукумати Ҷумҳурии Тоҷикистон баргузор гардид
Президенти Ҷумҳурии Тоҷикистон Эмомалӣ Раҳмон бо Сардори Ситоди муттаҳидаи Артиши Ҷумҳурии Исломии Покистон генерал Надим Раза мулоқот намуданд
ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Соҳибкор Шодибек Раҷабов дар ноҳияи Муъминобод Маркази саломатии замонавӣ бунёд намуд
Таъйиноти кадрӣ дар мақомоти иҷроияи ҳокимияти давлатии вилояти Хатлон