Дар Бохтар ба маъракаи барӯйхатгирии аҳолӣ ва фонди манзил 203 корманди муваққатӣ ҷалб гардидаанд

ДУШАНБЕ, 01.10.2020 /АМИТ «Ховар»/. Имрӯз дар вилояти Хатлон маъракаи муҳими  сиёсӣ — барӯйхатгирии аҳолӣ ва фонди манзили Ҷумҳурии Тоҷикистон оғоз гардид, ки дар он раиси шаҳри Бохтар Сиҷоуддин Саломзода ва сардори Раёсати Агентии омори назди Президенти Ҷумҳурии Тоҷикистон дар вилояти Хатлон Қурбон Ҳакимзода бо масъулини маъракаи барӯйхатгирӣ мулоқот намуданд. Дар ин бора ба хабарнигори АМИТ «Ховар» аз маркази матбуоти раиси шаҳри Бохтар иттилоъ доданд.

Маъракаи муҳими  сиёсӣ аз 1 то 15 октябри соли равон идома меёбад. Барои баргузории маъракаи мазкур дар шаҳри Бохтар 203 корманди муваққатӣ ҷалб гардида, дар ихтиёри онҳо 4 шуъбаи барӯйхатгирӣ, 33 қитъаи дастурдиҳии назоратчиён ва 162 қитъаи ҳисобчиён, биноҳои муҷаҳҳаз ва воситаҳои алоқа қарор дода шудаанд.

 Раиси шаҳри Бохтар Сиҷоуддин Саломзода ба ҳайси раиси комиссияи мусоидати барӯйхатгирии аҳолӣ ва фонди манзил иброз дошт, ки мақсад аз гузаронидани ин маъракаи муҳими сиёсӣ дастрас намудани маълумот дар бораи аҳолии Ҷумҳурии Тоҷикистон, ки барои таҳияи дурнамоҳои давлатӣ, консепсияҳо, стратегияҳо ва барномаҳои рушди иҷтимоӣ, иқтисодӣ, ҳисоботи ҷорӣ, пешгӯии шумора ва ҳайати аҳолӣ, омӯзиш, ҷойгиронӣ, истифодаи захираҳои меҳнатӣ ва гузаронидани тадқиқоти илмӣ заруранд, маҳсуб мешавад.

Сардори Раёсати Агентии омори назди Президенти Ҷумҳурии Тоҷикистон дар вилояти Хатлон Қурбон Ҳакимзода зикр дошт, ки дар  барӯйхатгирии имсола аввалин маротиба бақайдгирии аҳолӣ тариқи электронӣ, яъне бо истифода аз сомонаи интернетӣ, планшет ва усули анъанавӣ-пур кардани саволномаҳо дар варақаҳо гузаронида мешавад.

Ёдовар мешавем, ки барӯйхатгирии аҳолӣ дар 10 сол як маротиба гузаронида мешавад. Он маротибаи охирин дар Ҷумҳурии Тоҷикистон соли 2010 баргузор гардида буд.